Er megalodon ekki hættulegur?

Nafn þitt

Netfang þitt

Netfang móttakanda

Ruslpóstvörn =

Svar

Er megalodon ekki hættulegur?
Upprunalega hljóðaði spurningin svona:

Er megalodon ekki hættulegur? Útaf því hann er ekki á hættulega listanum.

Höfundur þessa svars veit ekki til hvaða hættulega lista fyrirspyrjandi er að vísa til en við þurfum ekki að hafa neinar áhyggjur af þessum stórvaxna hákarli nú á dögum þar sem tegundin dó út fyrir um 3,6 milljón árum.

Otodus megalodon, sem á íslensku mætti kannski kalla stórtanna, er aðeins þekktur á tönnum sem hafa fundist í jarðlögum. Þessar tennur eru geysistórar og þær gefa til kynna að líklega hafi megalodon verið risi að stærð. Hversu stór hann var munum við þó sennilega aldrei vita fyrir víst en vísindamenn hafa áætlað líkamsstærðina út frá tönnunum og miðað við hvíthákarlinn (Carcharodon carcharias) sem er skyld tegund. Líklega hafa stærstu megalodon getað orðið allt að 18 metrar á lengd en algengast að hákarlar þessarar tegundar hafi verið nokkuð minni eða rúmir tíu metrar. Til samanburðar má geta þess að stærstu hvíthákarlar mælast rúmlega 6 metrar langir.

Tennur megalodon voru afar sterkar, aðlagaðar að því að grípa í bráð og höfðu eflaust styrk til að mylja bein. Helsta bráð þeirra var sennilega selir, sækýr, sæskjaldbökur en ekki síst smærri hvalir eins og höfrungar og hnísur. Jafnvel hafa stærri tegundir komið við sögu eins og sléttbakar og mögulega búrhvalir. Engar sannanir eru þó fyrir slíku en á fornum hvalbeinum, til dæmis úr búrhvölum, hafa fundist æði merkileg tannaför sem langlíklegast eru eftir þessa miklu skepnu.

Ekki er vitað hvers vegna megalodon hvarf af sjónarsviðinu en það getur tengst kólnun sjávar við upphaf ísaldar fyrir rúmum þremur milljónum ára. Þá urðu breytingar á uppeldissvæðum þessara hákarla samfara breytingum á sjávarhita og sjávarstöðu og breytingar á útbreiðslu stærri hægsyndari stórhvala sem sennilega voru helsta bráð þeirra í kaldari sjó.

Heimildir og mynd:

• Boessenecker, R. W. o.fl. (2019). The Early Pliocene extinction of the mega-toothed shark Otodus megalodon: a view from the eastern North Pacific. PeerJ, 7, e6088.
• Pimiento, C. og Balk, M.A. (2015). Body-size trends of the extinct giant shark Carcharocles megalodon: a deep-time perspective on marine apex predators. Paleobiology, 41(3), 479–490.
• Yabe, H. o.fl. (2004). Age of Carcharocles megalodon (Lamniformes: Otodontidae): A review of the stratigraphic records. The Palaeontological Society of Japan. 75: 7–15.
• Mynd: Megalodon tooth with great white sharks teeth-3-2.jpg - Wikimedia Commons. Birt undir CC BY-SA 3.0 leyfi. (Sótt 14.7.2020).

...