Hverjar eru tíu algengustu fuglategundirnar á Íslandi?

Nafn þitt

Netfang þitt

Netfang móttakanda

Ruslpóstvörn =

Svar

Hverjar eru tíu algengustu fuglategundirnar á Íslandi?
Upprunalega spurningin hljóðaði svona:

Hvað eru topp 10 algengustu fuglategundirnar á Íslandi?

Samkvæmt upplýsingum um stærðir íslenskra fuglastofna sem finna má á vef Náttúrufræðistofnunar eru tíu algengustu fuglar landsins eftirfarandi:

Tegund	Fjöldi (pör)[1]
lundi (Fratercula arctica)	2.000.000
þúfutittlingur (Anthus pratensis)	1.500.000
fýll (Fulmarus glacialis)	1.200.000
langvía (Uria aalge)	690.000
rita (Rissa tridactyla)	580.000
heiðlóa (Pluvialis apricaria)	400.000
stuttnefja (Uria lomvi)	326.800
álka (Alca torda)	313.000
hrossagaukur (Gallinago gallinago)	300.000
lóuþræll (Calidris alpina)	275.000

Fuglafræðingar áætla að hér á landi verpi allt að tíu milljón fuglapör. Langflestir þessara fugla teljast til sjófugla eða allt að 7,5 milljón pör. Af tíu algengustu fuglategundum landsins eru sex tegundir sjófugla, það eru lundi, fýll, langvía, rita, stuttnefja og álka.

Lundi er algengasti fugl á Íslandi.

Lundi er algengasti fuglinn á Íslandi. Eins og aðrir sjófuglar ver lundinn mestum hluta ævi sinnar við eða á sjó, sækir fæðu sína í hafið en kemur á land til að verpa. Áætlað er að um tvær milljónir lundapara verpi hér á land. Stofninn var stærri fyrr á árum en rannsóknir hafa sýnt töluverða fækkun á þessari öld. Lundinn verpir umhverfis landið, gjarnan í eyjum eða hólmum, en stærsta lundabyggðin er í Vestmannaeyjum. Þar verpa rúmlega 800.000 pör.

Þótt sjófuglar séu í meirihluta á lista yfir algengstu fuglategundir á Íslandi þá er þúfutittlingur í öðru sæti. Þúfutittlingur er mófugl en það samheiti er notað yfir fugla sem velja sér opið mó- og mýrlendi til varps. Þar til fyrir nokkrum árum var talið að stofn þúfutittlings væri á bilinu 0,5-1 milljón pör en ítarlegri gögn frá síðasta áratug hafa leitt til þess að stofninn er nú metinn um 1,5 milljón pör. Þúfutittlingur verpir á láglendi allt umhverfis landið en finnst þó í allt að 600 m hæð yfir sjó.

Talið er að á Íslandi séu um 1,5 milljón pör þúfutittlinga.

Í þriðja sæti yfir algengustu fugla landsins er fýll. Hann var talinn næst algengastur fugla á Íslandi þar til stofnstærð þúfutittlings var endurmetin. Talið er að um 1,2 milljón fýlapör verpi hér á landi, langflest meðfram ströndinni á Vestfjörðum. Fýl hefur fækkað nokkuð á síðustu árum og áratugum.

Rétt er að hafa í huga að misítarlegar og misnýlegar upplýsingar liggja fyrir um stofnstærðir einstakra tegunda. Ný gögn sem leiða til endurmats geta breytt þessum lista, eins og dæmið um þúfutittling sannar. Annað dæmi sem mætti nefna er krían (Sterna paradisaea). Fyrir allnokkrum árum var giskað á að 250-500.000 kríupör verptu hér á landi og samkvæmt því hefði krían átt heima á listanum hér fyrir ofan. Þótt tölulegar upplýsingar um flest kríuvörp séu litlar þá er nú talið að fyrra mat hafi verið allt of hátt og matið var því fært niður í 150.000-250.00 pör.

Áhugasömum er bent á að lesa má meira um íslenskar fuglategundir á vef Náttúrufræðistofnunar.

Tilvísun:

1. ^ Upplýsingar um stofnstærðir eru af síðu fyrir hverja tegund á vef Náttúrufræðistofnunar.

Heimildir og mynd:

• Guðmundur A. Guðmundsson og Kristinn Haukur Skarphéðinsson. 2012. Vöktun íslenskra fuglastofna. Forgangsröðun tegunda og tillögur að vöktun. Náttúrufræðistofnun Íslands.
• Kristinn Haukur Skarphéðinsson, Borgný Katrínardóttir, Guðmundur A. Guðmundsson og Svenja N.V. Auhage. 2016. Mikilvæg fuglasvæði á Íslandi. Fjölrit Náttúrufræðistofnunar nr. 55. 295 s.
• Náttúrufræðistofnun. Fuglastofnar.
• Bjarnarey 2013 416. Flickr. Höfundur myndar Jósep Jósepsson. Birt undir leyfinu CC BY-NC 2.0. (Sótt 1.8.2024).
• Anthus pratensis, Cap Fréhel, France. Flickr. Höfundur myndar Donald Davesne. Birt undir leyfinu CC BY 2.0. (Sótt 1.8.2024).

...