Hvað gerir Anna Heiða fiskifræðingur í vinnunni?

Nafn þitt

Netfang þitt

Netfang móttakanda

Ruslpóstvörn =

Svar

Hvað gerir Anna Heiða fiskifræðingur í vinnunni?
Anna Heiða Ólafsdóttir er fiskifræðingur á uppsjávarlífríkissviði Hafrannsóknastofnunar. Hún er ábyrg fyrir verkefnum tengdum makríl og kolmunna. Viðfangsefni Önnu í vinnunni eru fjölbreytt og skiptast í vöktunarverkefni, vinnu á sjó, rannsóknir og kennslu. Helstu vöktunarverkefni eru gagnasöfnun fyrir stofnmat og þátttaka í árlegu stofnstærðarmati, auk skipulagningu, þátttöku og úrvinnslu gagna frá sjórannsóknaleiðöngrum.

Makríll og kolmunni eru víðförlir fiskistofnar og útbreiðslusvæði þeirra nær frá ströndum Portúgal norður fyrir heimsskautsbaug. Stofnmat og rannsóknaleiðangrar sem tengjast þessum tegundum eru því alþjóðlegt verkefni sem unnið er í samvinnu við önnur Evrópulönd innan vébanda Alþjóða hafrannsóknaráðsins.

Um þessar mundir einbeitir Anna Heiða sér að rannsóknum tengdum vistfræði makríls í Norðaustur-Atlantshafi í samstarfi við vísindamenn í Noregi, Færeyjum og Grænlandi. Markmið rannsóknanna er að skilja hvers vegna útbreiðslusvæði makríls að sumarlagi hefur tvöfaldast að stærð síðasta áratuginn. Eru þetta afleiðingar umhverfisbreytinga eða ekki? Einnig tekur hún þátt í rannsóknum á gönguleiðum makríls við Ísland, fæðunámi makríls í Grænlandssundi og á hrygningarsvæðum loðnu við Ísland. Anna Heiða hefur sinnt forfallakennslu við Háskólann á Akureyri og er stundakennari og leiðbeinandi í nemandaverkefnum við Sjávarútvegsskóla Sameinuðu þjóðanna.

Anna Heiða er fædd árið 1974. Hún lauk stúdentsprófi frá náttúrufræðibraut Menntaskólans í Reykjavík. Þaðan lá leið hennar í Háskóla Íslands og útskrifaðist hún með BS-gráðu í líffræði veturinn 2000. Eftir að hafa unnið í nokkur ár á Hafrannsóknastofnun hélt hún til Kanada í framhaldsnám. Hún útskrifaðist með meistara- og doktorsgráðu frá líffræðideild Memorial-háskóla í St. John's á Nýfundnalandi.

Í meistaranáminu rannsakaði Anna daglegan vöxt loðnulirfa og tengdi vaxtarhraða við umhverfisskilyrði. Bergmálsfræði og útbreiðsla loðnu á hrygningartíma var viðfangsefni í doktorsnáminu. Bergmálsfræði er sú tækni að nota hljóðbylgjur til að rannsaka, magn og útbreiðslu lífvera í hafinu. Frá Kanada hélt Anna til Færeyja þar sem hún var nýdoktor við Hafrannsóknastofnunina í Þórshöfn í Færeyjum í nokkur ár, áður en hún kom aftur til starfa á Hafrannsóknastofnuninni í Reykjavík haustið 2015.

Mynd:

• Úr Safni AHÓ.
• Modelling the spawning habitat of the Northeast Atlantic mackerel to understand the recent changes in distribution - WUR. (Sótt 15.02.2018).

...