Hversu mörg eldgos hafa verið á Íslandi síðustu fimmtíu árin?

Nafn þitt

Netfang þitt

Netfang móttakanda

Ruslpóstvörn =

Svar

Hversu mörg eldgos hafa verið á Íslandi síðustu fimmtíu árin?
Samkvæmt lista á heimasíðu Veðurstofu Íslands og að viðbættu gosinu í Fagradalsfjalli sem hófst í mars 2021 eru eldgos á 20. og 21. öldinni alls 45 talsins, þar af 25 gos síðustu 50 árin og 7 á þessari öld.

Eldgos í Fimmvörðuhálsi í mars 2010.

Að meðaltali hefur verið eitt eldgos tæplega þriðja hvert ár frá 1900, en vissulega er dreifingin ekki þannig í raun. Um miðja síðustu öld var lengsti goslausi kaflinn á Íslandi á því tímabili sem listinn nær yfir. Árið 1947 gaus Hekla en næsta eldgos þar á eftir var ekki fyrr en árið 1961 þegar gaus í Öskju. Sjötti áratugurinn er eini goslausi áratugur 20. aldarinnar.

Krafla er sú eldstöð sem oftast hefur gosið á þeirri rúmu öld sem listi Veðurstofunnar nær yfir. Hún var mjög virk á 8. áratug síðustu aldar og gaus alls níu sinnum, þar af eru þrjú gos árið 1980. Askja hefur gosið átta sinnum á þessu tímabili, þar af sjö sinnum á 3. áratug síðustu aldar. Grímsvötn hafa einnig gosið átta sinnum en dreifingin er yfir lengra tímabil, fyrsta gos 20. aldarinnar var í Grímsvötnum árið 1902 en nýjasta Grímsvatnagosið var 2004.

Ef hins vegar er litið á lengra tímabili, þá eru Grímsvötn, Hekla og Katla líklega virkustu eldfjöllin á Íslandi á sögulegum tíma eins og fjallað er um í svari við spurningunni Hvaða eldfjall hefur gosið mest?

Frekari fróðleikur á Vísindavefnum:

• Hvað er eldgos?
• Hvað eru mörg eldgos á Íslandi?
• Af hverju eru sum eldfjöll á Íslandi virk en önnur ekki?
• Er eldvirkni á Íslandi sveiflukennd?

Heimild:

• Eldgos á vef Veðurstofu Íslands. Skoðað 25. 3. 2021.
• Mynd: Veðurstofa Íslands © Ólafur Sigurjónsson. Sótt 24. 3. 2010.

...