Hvar eru íslensku peningarnir prentaðir, eða má enginn vita það?

Nafn þitt

Netfang þitt

Netfang móttakanda

Ruslpóstvörn =

Svar

Hvar eru íslensku peningarnir prentaðir, eða má enginn vita það?
Það er ekkert leyndarmál að íslensku peningaseðlarnir eru prentaðir hjá fyrirtæki í Englandi sem nefnist De La Rue. De La Rue er afar umsvifamikið fyrirtæki í peningaprentun og kemur að prentun peningaseðla í um 150 ríkjum. Fyrirtækið er nær tveggja alda gamalt og nefnt eftir stofnandanum, Thomas de la Rue. Íslensku seðlarnir hafa verið prentaðir þar síðan árið 1986 en það ár keypti De La Rue fyrirtækið Bradbury, Wilkinson & Co. sem hafði prentað íslenska seðla um langt árabil.

Seðlabankinn íslenski hefur skipt við þessi fyrirtæki frá stofnun bankans árið 1961. Fram að 1961 gaf Landsbankinn út peningaseðla og var þá bæði seðlabanki og hefðbundinn viðskiptabanki. Einnig hefur ríkissjóður sjálfur gefið út íslenska peningaseðla, forveri hans, Landssjóður Íslands, og Íslandsbanki hinn eldri. Þessir seðlar voru prentaðir á ýmsum stöðum, í Englandi, Danmörku, Þýskalandi og á Íslandi. Á Íslandi voru seðlar prentaðir í ríkisprentsmiðjunni Gutenberg.

The Royal Mint í London.

Íslensk mynt er nú slegin í Royal Mint í London og svo hefur verið síðan Seðlabankinn tók til starfa. Eldri mynt var bæði slegin í Bretlandi og Danmörku. Ýmis svokölluð tilefnismynt, það er peningar sem gefnir eru út af tilteknu tilefni en ekki ætlaðir til almennrar notkunar, hefur þó verið slegin víðar. Þannig var til dæmis 1000 króna peningur sem gefinn var út í tilefni af því að eitt þúsund ár voru liðin frá ferð Leifs Eiríkssonar til Norður-Ameríku sleginn vestanhafs.

Frekara lesefni á Vísindavefnum:

• Hvað myndi gerast ef gjaldmiðill eins og peningar yrði að öllu leyti lagður niður? eftir Gylfa Magnússon
• Hvað duga peningaseðlar og mynt lengi? eftir Stefán Arnarson
• Hvað er mikið til af íslenskum seðlum og myntum? eftir Gylfa Magnússon
• Eykst peningamagn í umferð með tilkomu greiðslukorta? eftir Gylfa Magnússon
• Hvernig eykst magn peninga í umferð í heiminum? eftir Gylfa Magnússon
• Ef Ísland vantar peninga af hverju framleiðum við þá bara ekki peninga? eftir Gylfa Magnússon
• Hvaða fisktegundir eru á íslensku myntinni og hvert er latneskt heiti þeirra? eftir ÍDÞ

Heimildir:

• Opinber gjaldmiðill á Íslandi, Myntrit 3, Seðlabanki Íslands, 2002
• Heimasíða De La Rue

Mynd:

• The American Numismatic Association. Sótt 26.2.2003.

...