Hvað er mikið til af íslenskum seðlum og myntum?

Nafn þitt

Netfang þitt

Netfang móttakanda

Ruslpóstvörn =

Svar

Hvað er mikið til af íslenskum seðlum og myntum?
Í ársskýrslu Seðlabanka Íslands fyrir árið 1999 kemur fram að í árslok 1999 voru seðlar og mynt í umferð 8,7 milljarðar króna. Þar af voru seðlar 7,5 milljarðar króna en mynt tæpir 1,2 milljarðar króna. Hæst varð upphæðin um verslunarmannahelgina en þá voru seðlar í umferð 7,6 milljarðar króna. Í árslok voru 5,8 milljónir seðla í umferð. Af heildarfjárhæð seðla í umferð var hlutur 5.000 krónu seðilsins stærstur, 68,3%, en næstur kom þúsundkallinn með 19,9%.

Þessar tölur eru reiknaðar þannig út að haldið er utan um það hve mikið er slegið og prentað af innlendum seðlum og mynt og frá því er dregið það sem hefur verið eyðilagt af Seðlabankanum sjálfum og það sem er í vörslu bankans. Það sem eftir stendur telst seðlar og mynt í umferð. Mikið af því er þó ekki í höndum almennings heldur í vörslu banka. Til dæmis liggja umtalsverðar upphæðir í hraðbönkum hverju sinni. Þá er vafalaust mikið af þessu fé týnt eða hefur eyðilagst, farið úr landi, til dæmis með erlendum ferðamönnum, og svo mætti lengi telja. Mikið af þeim seðlum og mynt sem samkvæmt talningu Seðlabankans telst í umferð er því í raun ekki í notkun.

Seðlabankinn fylgist kerfisbundið með þeim seðlum og myntum sem fara um hendur landsmanna og tekur úr umferð lúna seðla og mynt. Árið 1999 bárust seðlagreiningardeild bankans 21,4 milljónir seðla til vinnslu, samtals að fjárhæð 33,4 milljarðar króna. Umferðarhraði seðla, það er hve oft á ári hver seðlastærð fer um seðlagreiningardeildina, er mjög mismunandi. Sjaldnast fer 5.000 króna seðillinn eða í 4,4 skipti á ári að meðaltali en hver 1.000 krónu seðill fer 7 sinnum á ári í gegn að meðaltali. Meðalendingartími seðla er 45,4 mánuðir fyrir 5.000 krónu seðla en styttri fyrir aðra, minnst 10,7 mánuðir fyrir 500 krónu seðla. Mynt endist mun lengur. Í árslok 1999 var skipting seðla og myntar í umferð eftir stærðum þessi, í þúsundum króna:

Athyglisvert er að hérna eru meðal annars taldir upp seðlar sem ekki hafa verið í almennri notkun lengi, það er 100 kr., 50 kr. og 10 kr., og enn fremur aurar.

Frekara lesefni á Vísindavefnum:

• Hvað er mikið af peningum á jörðinni? eftir Gylfa Magnússon
• Hvernig eykst magn peninga í umferð í heiminum? eftir Gylfa Magnússon
• Hver fann upp peningana? eftir Gylfa Magnússon
• Hvaða ár var íslenska krónan tekin í notkun? eftir Ívar Daða Þorvaldsson
• Hvað duga peningaseðlar og mynt lengi? eftir Stefán Arnarson
• Eykst peningamagn í umferð með tilkomu greiðslukorta? eftir Gylfa Magnússon
• Hvaða fisktegundir eru á íslensku myntinni og hvert er latneskt heiti þeirra? eftir ÍDÞ

Heimild:

• Ársskýrsla Seðlabanka Íslands 1999

Upphaflega var spurt á þessa leið:

• Hvað er mikið af 1 krónu, 5 krónu, 10 krónu, 50 krónu og 100 krónu peningum í heiminum? Hvað eru til margir 500 krónu, 1000 krónu, 2000 krónu og 5000 krónu seðlar í heiminum? (Helgi)
• Hve mikið af ISK (íslenskum krónum) eru í umferð hverju sinni í reiðufé og hvernig er sú upphæð ákvörðuð? (Ólafur)

...