Er einhver útlitsmunur á kven- og karlhrafni?

Nafn þitt

Netfang þitt

Netfang móttakanda

Ruslpóstvörn =

Svar

Er einhver útlitsmunur á kven- og karlhrafni?
Í örstuttu máli þá er mjög lítill útlitsmunur á kven- og karlhröfnum.

Í líffræði er talað um kynbundna tvíbreytni, kyntvíbreytni eða kynferðistvímyndun (e. sexual dimorphism) þegar kerfisbundinn munur er á útliti eða atferli kynja sömu tegundar. Kynbundin tvíbreytni er mjög algeng og birtist á ýmsan hátt. Til að mynda getur verið mikill munur á stærð kynjanna, eins og hjá górillum þar sem karldýrin eru nokkuð stærri og allt að helmingi þyngri en kvendýrin. Eins getur kynbundin tvíbreytni falist í mismunandi árásar- og varnarbúnaði, eins og til dæmis á við um vígalegu hornin sem elgstarfar skarta. Makki karljóna og glæsilegar stélfjarðrir karlpáfugla eru líka góð dæmi um tvíbreytni og sama á við þegar kynin eru mislit eða misskrautleg, eins og sést meðal annars hjá ýmsum fuglategundum, svo sem stokköndum og æðarfuglum.

Hrafninn er hins vegar ein þeirra tegunda þar sem kynbundin tvíbreytni er lítil. Flest okkar greina engan mun á útliti kynja hrafnsins enda eru þau bæði alsvört og mjög áþekk í útliti að öðru leyti. Eini sjáanlegi munurinn er lítill stærðarmunur á kynjunum. Karlhrafnar eru að jafnaði aðeins stærri en kvenfuglar, en frekar erfitt er að greina þennan mun.

Heimildir og mynd:

• Bedrosian, B., Loutsch, J. & Craighead. D. (2008). Using Morphometrics To Determine the Sex of Common Raven. Northwestern Naturalist 89(1), 46-52.
• Boarman, W.I. & Heinrich, B. (1999). Common Raven (Corvus corax). Í The Birds of North America, No. 476 (A. Poole & F. Gill ritstj.). The Birds of North America, Inc, Philadelphia, PA.
• Common Raven. iNaturalist.
• Hinterland Who's Who - Common Raven. Canadian Wildlife Federation.
• Corvus corax ad berlin 090516.jpg. Wikimedia Commons. Höfundur myndar R. Altenkamp. Birt undir CC BY-SA 3.0 DEED leyfi. (Sótt 22.5.2024).

...