Hversu margar mávategundir eru á Íslandi og hvernig greinir maður þær í sundur?

Nafn þitt

Netfang þitt

Netfang móttakanda

Ruslpóstvörn =

Svar

Hversu margar mávategundir eru á Íslandi og hvernig greinir maður þær í sundur?
Mávar tilheyra mávaætt (Laridae) og teljast til strandfugla (Charadriiformes). Að staðaldri verpa sjö tegundir máva hér á landi. Fimm þeirra teljast til ættkvíslarinnar Larus, það er hvítmávur (Larus hyperboreus), svartbakur (Larus marinus), silfurmávur (Larus argentatus), sílamávur (Larus fuscus) og stormmávur (Larus canus) sem er nýjasti meðlimur í varpfánu máva hér á landi. Ein tegund tilheyrir ættkvíslinni Chroicocephalus, það er hettumávur (Chroicocephalus ridibundus) og ein tegund telst til ættkvíslarinnar Rissa, það er ritan (Rissa tridactyla). Auk þess eru nokkrar tegundir sem finnast hér á veturna eða sem flækingar, svo sem bjartmávur (Larus glaucoides), ísmávur (Pagophila eburnea) og klapparmávur (Larus cachinnans).

Mávum er oft skipt í tvo hópa til hægðarauka, stóra máva (svartbakur, sílamávur, silfurmávur, hvítmávur og fleiri) og litla (til dæmis stormmávur, rita og hettumávur). Hægt er að styðjast við stærð ásamt nokkrum fleiri greiningareinkennum þegar reynt er að þekkja mávategundir í sundur.

Svartbakurinn er stærstur máva. Hann er svartur á baki, yfirvængjum og vængbroddum en annars hvítur. Goggurinn er gulur og sterklegur með rauðum bletti fremst á neðri skolti. Fætur hans eru ljósbleikir og augun ljós.

Margir eiga erfitt með að þekkja sílamáv frá svartbak en sílamávurinn er minni og nettari. Bak hans og vængir eru dökkgráir og fæturnir gulir ólíkt ljósbleikum fótum svartbaksins.

Silfurmávur er stærsti mávurinn með grátt bak og svarta vængbrodda. Rétt eins og sílamávurinn hefur silfurmávur gulan gogg og rauðan lit á neðri skolti. Fæturnir eru ljósbleikir líkt og hjá svartbak.

Hvítmávur er svipaður svartbak að stærð en auðvelt að greina hann frá öðrum stórmávunum því bak hans er mun ljósara (ljósgrátt). Ólíkt sifurmávnum hefur hvítmávur hvíta vængbrodda. Hann er með bleika fætur en goggurinn er gulur með rauðan blett á neðri skolti.

Stormmávur er ekki ólíkur silfurmáv en mun minni. Hann er ljósgrár að ofan en vængbroddarnir svartir með hvítum doppum. Nef og fætur eru grængulir.

Rita er á stærð við stormmáv en lágfættari, blágrá á baki og yfirvængjum en með alsvarta vængbrodda. Nefið er heiðgult en fætur svartir. Þessar tvær tegundir, stormmávur og rita, eru áberandi minni en hinir svokölluðu stórmávar.

Hettumávur er minnsti mávurinn sem verpir hér á landi. Í sumarbúningi er hann með áberandi „grímu“ um ofanvert höfuð og niður á háls og því auðgreindur frá öðrum mávum. Hann er ljósgrár á baki og vængjum, með svarta vængodda en að mestu hvítur að öðru leyti. Fætur og goggur eru rauðir.

Heimildir og myndir:

• Fuglavefur-Máffuglar
• Charadriiformes | Náttúrufræðistofnun Íslands
• Glaucous gull (Larus hyperboreus) with offspring, Liefdefjord, Svalbard.jpg - Wikimedia Commons. (Sótt 4.10.2019).
• Larus argentatus01.jpg - Wikimedia Commons. (Sótt 4.10.2019).
• Larus-fuscus-graellsii-He.jpg - Wikimedia Commons. (Sótt 4.10.2019).
• Great Black-backed Gull Larus marinus.jpg - Wikimedia Commons. (Sótt 4.10.2019).
• Larus canus Common Gull in Norway.jpg - Wikimedia Commons. (Sótt 7.10.2019).
• Rissa tridactyla 4.jpg - Wikimedia Commons. (Sótt 7.10.2019).
• Chroicocephalus ridibundus (summer).jpg - Wikimedia Commons. (Sótt 7.10.2019).

...