Hversu fast geta tígrisdýr bitið og hvað á ég gera ef ég mæti stóru rándýri?

Nafn þitt

Netfang þitt

Netfang móttakanda

Ruslpóstvörn =

Svar

Hversu fast geta tígrisdýr bitið og hvað á ég gera ef ég mæti stóru rándýri?
Í heild hljóðaði spurningin svona:

Hversu fast geta tígrisdýr bitið og hversu erfitt er að vernda sig gegn þeim ef maður lendir í einu slíku?

Bitkraftur stórra rándýra eins og tígrisdýra (Panthera tigris) er mjög mikill og getur auðveldlega molað handlegg á manneskju. Bitkraftur er mælanlegur sem þrýstingur á flatamálseiningu og hefur verið mældur hjá mörgum dýrategundum, svo sem kattardýrum, hunddýrum, hákörlum og krókódílum. Niðurstöður sýna að líklega hafi saltvatns-krókódílar mesta bitkraftinn, um 260 kg/cm².

Bitkraftur tígrisdýra er meiri en hjá ljónum, hundum og björnum en litlu minni en hjá hýenum sem eru þekktar fyrir að mola niður bein. Mæligildi fyrir bitkraft tígrisdýra er um eittþúsund pund á fertommu (psi) eða um 70,3 kg/cm². Þetta er mikið afl og alveg ljóst að slíkt bit getur valdið stórfeldu tjóni. Til að mynda geta tígrisdýr auðveldlega klippt í sundur handlegg eða spennt í sundur hryggjarsúlu á meðalstórri bráð þótt þau reyni frekar að kæfa stærri bráðir eins og gaur-uxa (Bos gaurus) og birni (Ursus arctos).

Það er ólíklegt að Íslendingur lendi í þeirri aðstöðu að mæta stórum rándýrum nema á ferðalögum í óbyggðum í öðrum heimsálfum. Í slíkum aðstæðum er mikilvægt að hlaupa ekki frá rándýrinu, hvort sem það er stórt kattardýr, úlfur eða björn, því það örvar veiðieðli dýranna og litlar líkur á að menn nái að stinga dýrin af. Vísindavefurinn ábyrgist ekki örugg ráð til að sleppa úr slíkum aðstæðum en bendir á að í stað þess að hlaupa er talið vænlegra að manneskjan geri sig eins breiða og hún getur og sé í augnsambandi við rándýrið. Þá á líka að vera til bóta að framkalla hávaða þar sem slíkt getur haft fælingarmátt.

Ekki liggur fyrir hversu mörgum mönnum tígrisdýr verða að bana á ári hverju á jörðinni allri. Um 60% af tígrisdýrastofni heimsins er að finna á Indlandi og þar í landi drepa tígrisdýr að jafnaði nokkra tugi og allt yfir 100 manns á ári. Slíka staðreynd ber að taka alvarlega þegar farið er inn á svæði þar sem þessi dýr lifa.

Heimildir og myndir:

• Crocodiles Have Strongest Bite Ever Measured, Hands-on Tests Show | National Geographic.
• BBC - Earth - One creature had a bite more powerful than any other.
• 120 tiger deaths recorded in India in 2016 | Livemint.
• More than 1,000 people killed in India as human and wildlife habitats collide | Environment | The Guardian.
• Elephants and tigers kill one human a day in India, as growing population squeezes habitat | The Telegraph.
• Mynd: Free photo: Tiger, Predator, Animal, Tooth - Free Image on Pixabay - 500118. (Sótt 7. 11. 2017).

...