Hvað getur þú sagt mér um kameljón?

Nafn þitt

Netfang þitt

Netfang móttakanda

Ruslpóstvörn =

Svar

Hvað getur þú sagt mér um kameljón?
Kameljón (Chamaeleonidae) eru eðlur af undirflokknum Iguania en til eru um 160 tegundir af þeim. Þau finnast í Afríku, á Spáni, í Suður-Asíu og á Indlandi. Þau lifa einungis á hlýjum búsvæðum svo sem eyðimörkum en þó einkum í regnskógum. Fæætur kameljóna eru sérstaklega lagaðir til þess að klifra í trjám. Mörgum finnast kameljón sérkennileg í laginu en augu þeirra eru útstæð og geta hreyfst í sitthvora áttina. Auk þessa hafa þau hliðflatan skrokk, kamb á baki og langa, slímuga tungu til að veiða flugur og önnur skordýr. Stærri tegundir sækjast frekar eftir smáfuglum og stórum skordýrum.

Sum afbrigði af kameljónum skipta litum eftir hita og dýrin geta haft samskipti með litabreytingunum. Flest kameljón eru 17–25 cm á lengd en minnsta kameljónið sem hefur fundist er 29 millimetrar og er frá Madagaskar. Kvendýr kameljóna verpir um 20 eggjum og það tekur þau allt að 4–12 mánuði að klekjast, eftir því hver tegundin er. Kvendýrin grafa eggin í 10–30 cm djúpa holu til að halda þeim öruggum og hlýjum. Kameljón eru almennt alætur og éta næstum allt, svo sem lauf, skordýr, ávexti og fleira. Sum afbrigði éta aðeins kjöt en önnur vilja aðeins grænmeti.

Hægt er að lesa meira um eðlur á Vísindavefnum í svari við spurningunni Getið þið sagt mér allt um eðlur? Eru einhverjar þeirra hættulegar mönnum?

Heimildir:

• Snara.is - kameljón. (Skoðað 12.06.2014).
• Úr ýmsum áttum — Varðturninn VEFBÓKASAFN. (Skoðað 12.06.2014).
• Kameljón - Wikipedia, frjálsa alfræðiritið. (Skoðað 12.06.2014).

Mynd:

• Chameleon - Wikipedia, the free encyclopedia. (Sótt 12.06.2014).

---

Þetta svar er eftir nemendur í Háskóla unga fólksins, námskeiðum á vegum HÍ fyrir 12-16 ára ungmenni í júnímánuði 2014.

...