Hvaðan er kanill upprunalega og hvar finnst hann í náttúrunni?

Nafn þitt

Netfang þitt

Netfang móttakanda

Ruslpóstvörn =

Svar

Hvaðan er kanill upprunalega og hvar finnst hann í náttúrunni?
Kanill er krydd sem unnið er úr berki margra tegunda sígrænna trjáa. Trén eru af ættkvíslinni Cinnamomum í Lauraceae-ættinni. Kanill er bæði notaður í formi kanilstanga og dufts. Sumir telja að Cinnamomum verum (studum kallaður C. zeylanicium) sé hinn eini sanni kanill (e. true cinnamon). Um 80-90% af heimsframleiðslu C. verum kemur frá Srí Lanka, sem er eyja í Indlandshafi, en engin önnur tegund kanils finnst þar. Þar að auki er C. verum ræktað til útflutnings á eyjunni Madagaskar og Seychelles-eyjum. Hann má einnig finna á Suður-Indlandi, nálægt Srí Lanka, í Búrma, Suður-Ameríku og Vestur-Indíum.

Aðrar tegundir kanils eru gjarnan kallaðar cassia til aðgreiningar. Af þeim koma tveir þriðju hlutar heimsframleiðslu frá Indónesíu. Í Kína er einnig framleitt töluvert magn, en minna á Indlandi og í Víetnam. Þessar tegundir gefa rúmlega 70% af heimsframleiðslu á kanil, þannig eru einungis tæplega 30% sem teljast til hins sanna kanils.

Sögu kanils má rekja aftur til Egyptalands en þangað var hann fyrst fluttur fyrir um 4.000 árum eða um 2.000 f.Kr. Vafalaust hefur hann þó verið notaður sem krydd fyrir þann tíma þar sem hann finnst í náttúrunni. Kanill var þó ekki einungis notaður sem krydd. Hann var til að mynda notaður í ýmsum trúarlegum tilgangi, til dæmis sem gjöf til guða, enda var hann um tíma verðmætari en gull. Enn fremur var hann notaður sem rotvarnarefni fyrir kjöt og til galdra.

Þrátt fyrir vinsældir kanils, allt frá 2.000 f.Kr., tókst kaupmönnum að halda uppruna hans leyndum fram á 16. öld. Þannig náðu þeir að varðveita einokun sína á kanil. Með því að búa til sögur um erfiðleika sína í að nálgast afurðina, gátu þeir einnig réttlætt hátt verð hans.

Í lok 15. aldar taldi Kristófer Kólumbus (1451-1506) sig hafa fundið kanil í nýja heiminum en svo var ekki. Árið 1505 fundu Portúgalar kanilinn á eynni Seylon, sem nú heitir Srí Lanka. Um 1800 var kanill ekki jafnverðmætur og hann hafði verið, þar sem hann var nú ræktaður í öðrum heimshlutum, auk þess sem aðrar tegundir kanils, cassia, voru orðnar vinsælar.

Nú á tímum er kanill notaður til að krydda ýmsan mat og er auk þess afar vinsæll í bakstur.

Heimildir:

• Cinnamon - Wikipedia, the free encyclopedia. (Skoðað 28.06.2015).
• cinnamon | plant and spice | Britannica.com. (Skoðað 28.06.2015).
• Cinnamon's Spicy History – Hungry History – Food & Culinary History. (Skoðað 28.06.2015).
• Cinnamomum verum - Wikipedia, the free encyclopedia. (Skoðað 28.06.2015).
• Alan Davidson, The Oxford Companion to Food, Oxford University Press, Oxford 1999.

Myndir:

• Fyrri mynd: Cinnamon - Wikipedia, the free encyclopedia. (Sótt 28.06.2015).
• Seinni mynd: Cinnamon - Wikipedia, the free encyclopedia. (Sótt 28.06.2015).

---

Grunnurinn í þessu svari er skrifaður af nemendum í Háskóla unga fólksins, námskeiðum á vegum HÍ fyrir 12-16 ára ungmenni í júnímánuði 2015.

...