Af hverju lifa moldvörpur ekki á Íslandi?

Nafn þitt

Netfang þitt

Netfang móttakanda

Ruslpóstvörn =

Svar

Af hverju lifa moldvörpur ekki á Íslandi?
Moldvörpur lifa ekki í íslenskri náttúru en finnast víða í nágrannalöndunum, svo sem í Danmörku, syðst í Svíþjóð og á Bretlandseyjum, þó ekki á Írlandi. Um er að ræða tegund sem kallast Talpa europaea eða evrópska moldvarpan. Útbreiðsla tegundarinnar nær frá Bretlandseyjum austur í Mið-Rússland og suður til norðurhluta bæði Spánar og Ítalíu.

Tvær aðrar tegundir moldvarpa lifa á meginlandi Evrópu en útbreiðslusvæði þeirra eru fjær Íslandi. Þetta eru blindvarpan (Talpa caeca) sem finnst aðallega í löndum við Miðjarðarhafið og spænska moskumoldvarpan (Galemys pyrenaicus) sem lifir í norður- og miðhluta Spánar, í Portúgal, Andorra og Frakklandi (Pýreníafjöllum).

Dýralíf á Íslandi ber þess merki að landið er eyja lengst norður í hafi og ekki auðvelt fyrir nýjar tegundir landdýra að komast hingað. Refurinn var eina spendýrið sem var hér á landi við landnám, aðrar spendýrategundir hafa borist til landsins með manninum, viljandi eða óviljandi. Ekki er vitað til þess að moldvörpur hafa nokkurn tíma verið fluttar til Íslands og ólíklegt að slíkt yrði leyft enda eru ströng lög um innflutning dýra til landsins. Það er þó ekki hægt að útiloka að einhverjum hafi dottið í hug að smygla moldvörpu til landsins í einhverjum tilgangi en höfundur veit ekki um neinar heimildir um slíkt.

Moldvörpur höfðu áður fyrr slæmt orð á sér þar sem þær voru taldar spilla ræktarlandi og voru því lengi vel álitnar meindýr. Seinni tíma rannsóknir hafa hins vegar sýnt að þær bæta jarðveg með gangnagerð sinni og eru nú víða friðaðar. Það væri þó afar vafasamt að flytja þær hingað til lands þar sem þær eru ekki hluti af íslenskri náttúru og áhrif þeirra á vistkerfið væru vægast sagt ófyrirséðar.

Myndir:

• European mole range map.png - Wikimedia Commons. Höfundur korts: Udo Schröter. Birt undir CC BY-SA 3.0 leyfi. (Sótt 9.9.2021).
• Mr Mole.jpg - Wikimedia Commons. Höfundur myndar: Mick E. Talbot. Birt undir CC BY-SA 3.0 leyfi. (Sótt 9.9.2021).

...