Hvernig vita vísindamenn hversu mikið losnar af gróðurhúsalofttegundum í skógareldum?

Nafn þitt

Netfang þitt

Netfang móttakanda

Ruslpóstvörn =

Svar

Hvernig vita vísindamenn hversu mikið losnar af gróðurhúsalofttegundum í skógareldum?
Til að reikna hversu mikið losnar af gróðurhúsalofttegundum í gróðureldum (sem skógareldar tilheyra) þarf að vita hversu stórt svæði hefur brunnið, hvaða gróður er á svæðinu og hversu mikið af honum brann, en ekki brennur alltaf allt að fullu. Þegar þessar upplýsingar liggja fyrir er hægt að nota vel þekkta stuðla til að reikna hversu mikið af gastegundum myndast við brunann og þar af leiðandi finna út hversu mikið af gróðurhúsalofttegundum losna.

Til að reikna þetta nákvæmlega þarf því góðar upplýsingar um magn, tegund og ástand gróðurs á því svæði sem brennur.^[1] Rakastig, árstíð og fleira hefur áhrif á bæði magn lífmassa og hversu auðveldlega hann brennur. Fyrir sama svæði fer því losunin eftir árstíma og veðuraðstæðum, auk þess sem ákafi eldanna (hitastig) hefur mikil áhrif.

Með því að kortleggja gróðurfar og stærð svæða sem brennur er því hægt að meta magn gróðurhúsalofttegunda sem eldarnir losa. Gervitunglagögn eru yfirleitt notuð til að meta stærð og ákefð stórra gróðurelda.

Ef magnið sem brennur og gróðurfar er þekkt, er tiltölulega auðvelt að reikna magn gróðurhúsalofttegunda sem losna. Um helmingur af þurrum lífmassa er kolefni (C) og meirihluti lífræns efnis sem brennur verður að CO₂, auk þess CH₄ og N₂O. Einnig myndast önnur gös í minna mæli, sót og aðrar agnir.^[2]

Í miklum sinueldum sem hafa verið nefndir Mýraeldar og geisuðu í Hraunhreppi vorið 2006, losnuðu um 27 þúsund tonn af CO₂ ígildum; þar af 25 þúsund tonn CO₂, 72 tonn CH₄ og 2 tonn N₂O.^[3] Vegna mismunandi hitunaráhrifa lofttegunda hafa CH₄ og N₂O mun meiri áhrif en CO₂ og er magntölum þeirra því jafnan breytt í CO₂ ígildi.

Nákvæmlega hve mikið CO₂ gróðureldar á heimsvísu losa er erfitt að meta, talið er að það séu um 400 milljón tonn af CO₂ ígildum á ári undanfarin 20 ár, meðan heildarlosun var 32.500 milljón tonn af CO₂ ígildum 2017. Losun gróðurhúsalofttegunda af völdum gróðurelda er því 5 - 10% af árlegri heildarlosun gróðurhúsalofttegunda. Í þessari tölu er tekið tillit til og leiðrétt fyrir því að gróður vex sums staðar aftur eftir elda.

Tilvísanir:

1. ^ Battye, W., & Battye, R. (2002). Development of Emissions Inventory Methods for Wildland Fire. U.S. Environmental Protection Agency (Vol. 27713).
2. ^ Urbanski, S. (2014). Wildland fire emissions, carbon, and climate: Emission factors. Forest Ecology and Management, 317, 51–60. https://doi.org/10.1016/j.foreco.2013.09.012.
3. ^ Jón Guðmundsson. (2007). Mýraeldar 2006: Fyrstu niðurstöður rannsókna á sinueldunum og áhrifum þeirra á lífríki (pdf, 6,8 MB). Náttúrufræðistofnun Íslands, Náttúrufræðistofa Kópavogs, Landbúnaðarháskóli Íslands.

Myndir:

• Frá höfundi.
• Bush fire at Captain Creek central Queensland Australia..JPG - Wikimedia Commons. Birt undir CC BY-SA 3.0 leyfi. (Sótt 13.1.2020).

Spurningu Helenu er hér svarað að hluta....