Hvað var María Mey gömul þegar hún átti Jesú?

Nafn þitt

Netfang þitt

Netfang móttakanda

Ruslpóstvörn =

Svar

Hvað var María Mey gömul þegar hún átti Jesú?
María mey, einnig kölluð María guðsmóðir, var eftir því sem fram kemur í Lúkasar- og Matteusarguðspjöllum Nýja testamentisins móðir Jesú frá Nasaret, sem samkvæmt kristinni trú er sonur Guðs og sá messías sem Gamla testamentið spáði fyrir um að myndi frelsa mannkynið.

Í Biblíunni kemur hvergi fram nákvæmlega hversu gömul María var þegar hún átti Jesú, en fræðimenn hafa dregið þá ályktun út frá hefðum samtíma hennar að hún hafi líklega verið 12-14 ára gömul. Í Lúkasarguðspjalli kemur fram að María hafi verið nýtrúlofuð trésmiðnum Jósef þegar erkiengillinn Gabríel birtist henni og færði henni þær fregnir að hún væri útvalin til að ganga með barn Guðs. María varð hrædd og undrandi og spurði Gabríel:

„Hvernig má þetta verða, þar eð ég hef ekki karlmanns kennt?“

Og engillinn sagði við hana: „Heilagur andi mun koma yfir þig og kraftur hins hæsta mun yfirskyggja þig. Fyrir því mun og barnið verða kallað heilagt, sonur Guðs.“

María varð þannig þunguð og fæddi Jesú Krist níu mánuðum síðar, en kristnir menn halda jólin hátíðleg í tilefni þess 25. desember ár hvert.

Hefð var fyrir því meðal gyðinga á fyrstu öld fyrir Krist að stúlkur væru lofaðar um leið og þær urðu kynþroska. Aldur Maríu er þannig áætlaður út frá þeim aldri sem algengast er að blæðingar hefjist. Algengt var að stúlkur gengju í hjónaband um 14 ára aldur, og því hefur María líklegast ekki verið mikið eldri en það þegar hún varð þunguð.

Boðunardagur Maríu, einnig kallaður Maríumessa á lönguföstu, er haldinn 25. mars ár hvert, níu mánuðum fyrir jól. Dagurinn var mikil hátíð í kaþólskum sið, og var haldinn hátíðlegur hér á landi langt eftir siðaskipti.

Heimildir:

• Árni Björnsson. Saga daganna. Reykjavík: Mál og menning, 1994.
• Lúkasarguðspjall.
• The Catholic Encyclopedia. (Sótt 27. júlí 2021.)
• Þórhallur Heimisson. Boðunardagur Maríu. Kirkjan, 20. mars 2010. (Sótt 27. júlí 2021.)

Mynd:

• Leonardo Da Vinci - Annunciazione. Myndin er eftir Leonardo da Vinci og fengin af Wikimedia Commons. (Sótt 20. júlí 2021.)

Hér er einnig svarað eftirfarandi spurningum:

Hvað var María Mey gömul þegar Guð „barnaði“ hana?

Hver er María mey?

Höfundur þakkar Haraldi Hreinssyni aðjúnkt á menntavísindasviði fyrir yfirlestur og ábendingar....