Hvað hefur vísindamaðurinn Haraldur Bernharðsson rannsakað?

Nafn þitt

Netfang þitt

Netfang móttakanda

Ruslpóstvörn =

Svar

Hvað hefur vísindamaðurinn Haraldur Bernharðsson rannsakað?
Haraldur Bernharðsson er dósent í miðaldafræði við Íslensku- og menningardeild Hugvísindasviðs Háskóla Íslands og forstöðumaður Miðaldastofu Háskóla Íslands. Haraldur er málfræðingur og fæst einkum við rannsóknir á forníslensku, íslenskri málsögu og íslenskum miðaldahandritum. Meginviðfangsefnið er þær breytingar sem orðið hafa á íslensku máli í tímans rás og breytileiki (eða mállýskumunur) á fyrri öldum eins og hann birtist í fornum handritum. Þá hefur Haraldur fengist við rannsóknir á stöðlun íslensku á nítjándu öld þegar málfyrirmynda var gjarna leitað í forníslensku.

Haraldur sat í Íslenskri málnefnd í níu ár og átti meðal annars þátt í mótun íslenskrar málstefnu sem Alþingi samþykkti 2009 og gerð nýrra ritreglna. Ennfremur hefur hann tekið þátt í norrænum samstarfsnefndum um málnotkun í háskólastarfi á Norðurlöndum. Haraldur hefur byggt upp og stýrir alþjóðlegu meistaranámi í norrænum miðaldafræðum (Viking and Medieval Norse Studies) sem sótt er af erlendum nemendum hvaðanæva úr heiminum.

Haraldur fæddist á Akureyri 1968 og lauk stúdentsprófi frá Menntaskólanum á Akureyri 1988. Hann lauk BA-prófi í íslensku frá Háskóla Íslands 1991, MA-prófi í íslenskri málfræði frá sama skóla 1995, MA-prófi í málvísindum frá Cornell-háskóla í New York 1998 og doktorsprófi í málvísindum frá sama skóla 2001.

Haraldur var styrkþegi við málvísindadeild Harvard-háskóla 1999–2001, nýdoktor við Hugvísindastofnun Háskóla Íslands 2001–2005 og við Stofnun Árna Magnússonar 2005–2008, gegndi rannsóknastöðu Árna Magnússonar við Stofnun Árna Magnússonar í íslenskum fræðum 2008–2010, var sérfræðingur við Hugvísindastofnun Háskóla Íslands 2011–2012 og hefur verið dósent í miðaldafræði við Íslensku- og menningardeild frá 2012.

Mynd:

• Úr safni HB.

...