Er til íslenskt orð yfir phubbing?

Nafn þitt

Netfang þitt

Netfang móttakanda

Ruslpóstvörn =

Svar

Er til íslenskt orð yfir phubbing?
Margir hafa vanið sig á að líta á símann sinn hvar sem er, til dæmis á fundum eða veitingastöðum. Þetta fyrirbæri, sem flestir þekkja, hefur fengið heitið phubbing á ensku og er sett saman úr ensku orðunum phone ‘sími’ og snub ‘hunsa’. Phubbing er hunsunin sem maður sýnir öðrum með því að líta á símann í stað þess að veita raunverulegu umhverfi sínu athygli. Sem dæmi má nefna tvo einstaklinga sem sitja saman á veitingastað. Annar þeirra reynir eftir fremsta megni að ná augnsambandi á meðan hinn aðilinn starir á snjallsímann. Þegar maturinn kemur er tekin mynd af honum og sett á samfélagsmiðla.

Hugtakið phubbing var myndað árið 2012 sem hluti af herferð gegn þeim ósið að hafa sífellt athyglina á símanum. Herferðin var á vegum áströlsku orðabókarinnar Macquarie Dictionary og auglýsingastofan McCann í Melbourne stóð fyrir því að myndað var nýyrði til að vekja athygli á þessu háttalagi. Umrædd herferð fékk heitið Stop Phubbing og hefur hún verið tekin upp í fjölmörgum löndum.

Vefsíðan stopphubbing.com og Facebook-síðan Stop Phubbing hafa jafnframt verið stofnaðar til að vekja athygli á því hvernig snjallsíminn getur tekið yfir líf margra sem vilja ekki missa af neinu og hafa símann sífellt við höndina til að fylgjast með uppfærslum á samfélagsmiðlum, skoða myndbönd á YouTube eða senda myndir á Facebook, Snapchat eða Instagram.

Þetta fyrirbæri hefur ekki enn fengið íslenskt heiti. Rétt er að benda á að enda þótt eitthvert fyrirbæri sé til, þá þarf ekki nauðsynlega orð fyrir það, það er hægt að tala um það án þess að til sé sérstakt orð um það. Það er til dæmis hægt að lýsa því á þann hátt að einhver sé „hangandi í símanum“ eða eitthvað í þeim dúr. Kosturinn við að hafa sérstakt orð yfir fyrirbærið er að það fær meiri athygli fyrir vikið. Vitundarvakning er líklegri til að heppnast ef til er sérstakt orð sem hægt er að nota í herferð.

Hvað gæti verið íslenskt orð fyrir þetta fyrirbæri og hvað gæti sambærileg herferð kallast hér á landi? Eins og komið hefur fram þá er enska orðið myndað á þann hátt að tveimur orðum (phone og snub) er blandað saman en slík orðmyndun er afar óalgeng í íslensku. Símunsun (nafnorð myndað af ‘sími’ og ‘hunsun’) og símunsa (sagnorð) og símunsari (gerandheiti) eru ekki líkleg til að slá í gegn og tökuorðið föbbing hljómar ekki vel á íslensku.

Hvaða íslenskt orð má nota um þann sem starir í sífellu á símann? Getur hann kallast símstola, er hann símsturlaður eða er hann með símstol? Gæti herferð gegn þessu háttalagi kallast Stöðvum símunsun! eða einfaldlega Líttu upp! eða Leggðu símann frá þér!

Á Stofnun Árna Magnússonar í íslenskum fræðum er haldið utan um nýyrði og hægt er að koma á framfæri ábendingum um nýyrði eða nýyrðatillögur, til dæmis um phubbing, í tölvupósti í gegnum netfangið arnastofnun@hi.is.

Athugasemd frá ritstjórn: Á Facebook-síðu þáttarins Orðbragð var stungið upp á að símsneiða hjá einhverjum.

Heimildir:

• Macquarie "Phubbing: A Word Is Born" // McCann Melbourne - YouTube. (Skoðað 08.07.2016).
• Facebook: Stop Phubbing. (Skoðað 08.07.2016).
• Stop Phubbing. (Skoðað 08.07.2016).

Myndir:

• Fyrri mynd: Stop Phubbing. (Sótt 08.07.2016).
• Seinni mynd: Meals over great conversation ... | Flickr - Photo Sharing! Myndrétthafi er Natalie. Myndin er birt undir Creative Commons-leyfi. (Sótt 08.07.2016).

...