Hver er meðalstærð hvalatyppa?

Nafn þitt

Netfang þitt

Netfang móttakanda

Ruslpóstvörn =

Svar

Hver er meðalstærð hvalatyppa?
Hvalir eru mjög misstórir eftir tegundum allt frá steypireyð (Balaenoptera musculus), sem getur orðið um 30 metrar á lengd og vegið hátt í 200 tonn til lítilla höfrunga (Delphinidae) sem eru innan við tveggja metra langir. Það sama gildir að sjálfsögðu þegar kemur að lengd getnaðarlima hvala, breytileikinn er svo mikill að getnaðarlimur stærstu hvala er lengri en líkamslengd minnstu hvalanna. Það segir okkur því mjög lítið að ætla að finna meðallengd getnaðarlima allra hvalategunda samanlagt, frekar ætti að skoða meðalstærð hjá einstökum tegundum.

Það þarf ekki að koma neinum á óvart að getnaðarlimur steypireyðar er sá stærsti sem þekkist í dýraríkinu. Að vísu komast vísindamenn kannski ekki svo oft og auðveldlega í návígi við steypireyðartarf með lim í fullri reisn til þess að gera mælingar en þeir hafa getað mælt lengd þessa höfuðdjásns steypireyðartarfanna þegar hvali rekur á land og einnig á árum áður þegar tegundin var veidd. Steypireyður var friðuð árið 1960.

Vissulega er limur steypireyðar breytilegur að stærð eins og við þekkjum hjá öðrum dýrategundum en að meðaltali er lengd getnaðarlims þessa risavöxnu skepnu er 2,4 metrar. Eistun eru hvort um sig á bilinu 45 – 68 kg og við sáðlát losa tarfarnir um 20 lítra af sæði. Hvalir geyma getnaðarlim sinn í einhvers konar slíðri í kviðnum og færist hann út við mök.

Þess má geta að tarfar gresjufílsins (Loxodonta africana) hafa stærsta getnaðarlim núlifandi landdýrs en lengd hans er að jafnaði um 1,8 metrar.

Heimildir:

• Mitchinson, John; Lloyd, John (2007). The Book of General Ignorance. Random House Digital, Inc. p. 62.
• Bortolotti, Dan (2008). Wild Blue: A Natural History of the World's Largest Animal. Macmillan. p. 9
• Blue Whale Reproduction - Organismal Biology - University of Wisconsin LA Crosse.
• Mynd: Blue Whale Penis.jpg - Wikimedia Commons. Höfundur myndar: Richard Gould. (Sótt 5. 9. 2014).

...