Hvaða tegund smáfugla er algengust í garðinum mínum á veturna?

Nafn þitt

Netfang þitt

Netfang móttakanda

Ruslpóstvörn =

Svar

Hvaða tegund smáfugla er algengust í garðinum mínum á veturna?
Félagsmenn Fuglaverndar telja fugla á nokkrum þéttbýlisstöðum tvisvar á ári, auk þess sem einstaklingar eru hvattir til að fylgjast með fuglalífinu í garðinum hjá sér í hverri viku yfir vetrartímann og senda félaginu niðurstöður. Þetta hefur verið gert á hverju ári síðan veturinn 1994/95. Tilgangurinn er að fá upplýsingar um fuglategundir og fjölda fugla sem halda til í görðum landsmanna yfir vetrarmánuðina og einnig vekur þetta áhuga á fólks á fuglalífinu í sínu nánasta umhverfi.

Kannanir undanfarin fjögur ár sýna að fjórar tegundir spörfugla eru algengast í görðum á Íslandi að vetrarlagi. Það eru skógarþröstur (Turdus iliacus), snjótittlingur (Plectrophenax nivalis), stari (Sturnus vulgaris) og auðnutittlingur (Carduelis flammea).

Niðurstaða garðfuglakönnunar sem framkvæmd var dagana 23. - 26. janúar 2009 sýndi að starinn var algengastur allra garðfugla. Alls voru taldir 1250 starar sem er 30,6% allra fugla sem taldir voru á athugunartímanum. Af 115 athugunarstöðum sáust starar á 50 stöðum. Þótt sæist til færri skógarþrasta, 660 eða 15,4% allra fugla sem taldir voru, þá sáust þeir á mun fleiri stöðum en starar, eða 74. Þessar tvær tegundir auk snjótittlings og auðnutittlings voru í sérflokki hvað varðar fjölda einstaklinga.

Hrafnar (Corvus corax) og svartþrestir (Turdus merula) sáust líka nokkuð víða en fjöldi einstaklinga var mun minni. Það er kannski svolítið merkilegt hvað svartþrestir sáust á mörgum athugunarstöðum þar sem tegundin er tiltölulega nýlegur landnemi á Íslandi.

Aðrar fuglategundir sem sáust í könnuninni voru meðal annars flækingsfuglar sem sjást oft í þéttbýli á veturna eins og silkitoppa (Bombycilla garrulus), glóbrystingur (Erithacus rubecula) og gráþröstur (Turdus pilaris) auk rjúpu (Lagopus muta), glókolls (Regulus regulus) og nokkurra annarra tegunda.

Á Vísindavefnum eru mörg svör sem fjalla um fugla á einn eða annan hátt, til dæmis:

• Hvar hafa spörfuglar á Suðurlandi náttstað? eftir Jóhann Óla Hilmarsson
• Þrífst lundi á Íslandi bara í Grímsey og Vestmannaeyjum? eftir Jón Má Halldórsson
• Getið þið sagt mér einhverjar þjóðsögur um hrafninn? eftir Önnu Þorbjörgu Ingólfsdóttur

Heimild og mynd:

• Garðfuglavefurinn. Skoðað 9. 3. 2009
• Mynd: Skógarþröstur - Redwing - Turdus iliacus | Flickr. Höfundur myndar: Óskar Elías Sigurðsson. Birt undir CC BY 2.0 leyfi. (Sótt 27.5.2020).

...