Hvar finn ég sundurliðaðar upplýsingar um erlendar skuldir þjóðarbúsins í hlutfalli við verga landsframleiðslu?

Nafn þitt

Netfang þitt

Netfang móttakanda

Ruslpóstvörn =

Svar

Hvar finn ég sundurliðaðar upplýsingar um erlendar skuldir þjóðarbúsins í hlutfalli við verga landsframleiðslu?
Upprunalega spurningin hljóðaði svona:

Hversu hátt er hlutfall erlendra skulda þjóðarbúsins, ríkis og sveitarfélaga, í prósentum talið miðað við verga landsframleiðslu (enska: GDP) Íslands á ári?

Seðlabankinn heldur utan um tölur á þessu sviði og birtir reglulega. Meðal annars er hægt að sjá að í lok september 2024 voru heildarskuldir þjóðarbúsins áætlaðar 3.404 milljarðar króna.^[1] Nú er það auðvitað svo að þjóðarbúið hefur ekki kennitölu og skuldar ekkert en þetta er samtala fyrir alla innlenda aðila. Af þessu skuldaði ríkissjóður 406 milljarða og Seðlabankinn 79 milljarða til viðbótar. Innlánsstofnanir skulduðu 929 milljarða og þótt hluti þeirra séu í eigu ríkisins þá teljast þær skuldir ekki með skuldum þess. Það sama má segja um skuldir flestra ríkisfyrirtækja, þar á meðal Landsvirkjunar. Aðrar skuldir hvíla á herðum margvíslegra fyrirtækja, þar á meðal fyrirtækja sem teljast íslensk þótt þau séu í eigu erlendra aðila.

Til að setja þessar tölur í samhengi við verga landsframleiðslu þá er hægt að skoða upplýsingar um hana á vef Hagstofunnar. Hún var áætluð 4.321 milljarður árið 2023 en það eru nýjustu tölur þegar þetta svar er tekið saman.^[2] Skuldirnar samsvöruðu því um 79% af vergri landsframleiðslu þess árs en verða fyrirsjáanlega aðeins lægra hlutfall af landsframleiðslu ársins 2024 því að hún hefur vaxið að nafnvirði milli ára.

Sem betur fer eru líka til verulegar erlendar eignir sem innlendir aðilar eiga. Seðlabankinn birtir líka tölur um þær.^[3] Eignirnar voru metnar á 6.351 milljarð í lok september 2024. Stór hluti þess voru erlend verðbréf í eigu lífeyriskerfisins.

Fleira skiptir máli í þessu samhengi, meðal annars fyrirtæki sem erlendir aðilar eiga hérlendis. Þegar allt er tekið saman, annars vegar eignir sem erlendir aðilar eiga hérlendis og skuldir innlendra aðila við erlenda og hins vegar eignir sem innlendir aðilar eiga í útlöndum og skuldir erlendra við innlenda er hægt að reikna út svokallaða hreina erlenda stöðu þjóðarbúsins. Hún er munurinn á eignum þjóðarbúsins og skuldum í þessum skilningi. Staðan var talin jákvæð um 1.793 milljarða í lok september 2024.

Tilvísanir:

1. ^ Erlendar skuldir. (Sótt 6.02.2025).
2. ^ Peningalegar eignir og skuldir hins opinbera 1998-2023. PxWeb. (Sótt 6.02.2025).
3. ^ Erlend staða þjóðarbúsins. (Sótt 6.02.2025).

Ítarefni:

• Hagtölur. (Sótt 6.02.2025).
• Fjármál hins opinbera - Hagstofa Íslands. (Sótt 6.02.2025).

Mynd:

• Hagstofa Íslands. (Sótt 6.02.2025).

...