Í hvaða landi eru flest tré?

Nafn þitt

Netfang þitt

Netfang móttakanda

Ruslpóstvörn =

Svar

Í hvaða landi eru flest tré?
Skóglendi þekur um 30% af þurrlendi jarðar. Samkvæmt niðurstöðum viðamikils verkefnis sem fólst í að kortleggja þéttleika skóga í heiminum og meta fjölda trjáa er talið að heildarfjöldi trjáa á jörðinni séu um 3,04 billjónir.

Einhverjum kynna að detta í hug að flest tré í heiminum væru í Brasilíu þar sem stærsti hluti Amasonregnskógarins tilheyrir Brasílíu. Svo er þó ekki heldur er Rússland með sína miklu barrskóga á toppnum. Rússland er stærsta land í heimi, rúmlega 17 milljón ferkílómetrar að flatarmáli. Af því telst rétt tæplega helmingur vera skógi vaxinn. Áætlað er að fjöldi trjáa í landinu sé um 642 milljarðar eða rúmlega 20% af trjám heimsins. Næst á eftir kemur Kanada með um 318 milljarða trjáa, Brasilía með 302 milljarða, Bandaríkin með 228 milljarða, Kína með 140 milljarða og Kongó með 101 milljarð trjáa. Samtals eru yfir helmingur trjáa í heiminum í þessum sex löndum. Að Kongó undanskildu eru þetta þau fimm lönd sem eru í fimm efstu sætunum yfir stærstu lönd heims að flatarmáli.

Það er kannski ekki óeðlilegt að í löndum sem eru mjög stór að flatarmáli sé að finna mjög mörg tré og skógar þeki stór landsvæði. Þegar við skoðum hins vegar hversu stórt skóglendi er af flatarmáli lands er listinn allur annar og smærri lönd komast á kortið. Súrínam hefur hæsta hlutfall skóga en talið er að yfir 97% af flatarmáli landsins sé skógi vaxið. Önnur lönd þar sem yfir 90% af flatarmáli telst til skóglendis eru Gvæjana, Gabon, Salómonseyjar og Palaú. Þessi lönd eiga það öll sameiginlegt að liggja í hitabeltinu, tiltölulega nálægt miðbaug og aðstæður þar því allt aðrar en til dæmis í Rússlandi og Kanada.

Þrátt fyrir mikinn fjölda trjáa komast Rússland og Kanada heldur ekki á lista yfir þau tíu lönd þar sem fjölbreytileiki trjátegunda er hvað mestur. Þar trónir Brasilía á toppnum með rúmlega 8.700 tegundir trjáa og á eftir koma Kólumbía með um 5.700 tegundir og Indónesía með 5.100 tegundir. Þetta þarf ekki að koma á óvart enda er líffræðilegur fjölbreytileiki töluvert meiri í regnskógum hitabeltisins en á norðlægari slóðum.

Heimildir og myndir:

• Crowther, T., Glick, H., Covey, K. o.fl. (2015). Mapping tree density at a global scale. Nature 525, 201–205 (2015).
• Ritchie, H. (2021). Forest area. OurWorldInData.org.
• Beech, E., Rivers, M., Oldfield, S., & Smith, P. P. (2017). GlobalTreeSearch: The first complete global database of tree species and country distributions. Journal of Sustainable Forestry, 36(5), 454–489.
• FAO & UNEP. (2020). The State of the World’s Forests 2020. Forests, biodiversity and people. Rome.
• Kort: Ritchie, H. (2021). Forest area. OurWorldInData.org. Birt undir CC BY 4.0 DEED leyfi. Íslenskur texti settur inn af ritstjórn Vísindavefsins.
• Mynd: View of the Suriname river from the Blauwe Berg, or Blue Mountain, on the former Berg en Dal plantation (32723127203).jpg. Wikimedia Commons. Höfundur myndar JvL. Birt undir CC BY 2.0 DEED leyfi.

...