Er einhver munur á trú karla og kvenna á yfirnáttúruleg fyrirbæri?

Nafn þitt

Netfang þitt

Netfang móttakanda

Ruslpóstvörn =

Svar

Er einhver munur á trú karla og kvenna á yfirnáttúruleg fyrirbæri?
Samkvæmt könnunum Félagsvísindastofnunar á þjóðtrú Íslendinga og reynslu þeirra af yfirnáttúrulegum fyrirbærum sem framkvæmdar voru á árunum 1974^[1], 2006-2007^[2] og 2023^[3] er (og hefur lengi verið) stór munur milli trúar karla og kvenna á yfirnáttúruleg fyrirbæri. Það sama gildir um reynslu, þar sem konur virðast segja oftar frá yfirnáttúrulegri reynslu en karlar.

Í nýjustu könnuninni frá 2023 var spurt um viðhorf til berdreymis; nafnavitjunar; hugboða; forspárhæfileika; skyggni; framhaldslífs; svipa manna og dýra; yfirnáttúrulegra hreyfinga; reimleika; álfa og huldufólks; álagabletta; ættarfylgja; fylgja; bænalæknis / huglæknis; fljúgandi furðuhluta; blómaálfa; guðs; og ásatrúar, og reynslu fólks af sumum þessa fyrirbæra. Um var að ræða svonefnda panelkönnun^[4] með um 2800 þátttakendum. Hér fyrir neðan eru nokkur dæmi um viðhorf karla og kvenna og eru tölurnar vigtaðar (V).^[5] Setningarnar sem þátttakendur voru látnir lýsa afstöðu sinni til eru birtar fyrir neðan hvert súlurit fyrir sig.

Eina undantekningin virðist vera trú á fljúgandi furðuhluti, en karlmenn í dag virðast hafa meira trú á slík fyrirbæri en konur í dag.

Athugið að í könnuninni voru aðeins notuð hugtökin „karl“ og „kona“ í sambandi við kyn til þess að geta borið tölurnar saman við kannanir frá 1974 og 2006/2007. Athyglisvert væri að gera nýja könnun þar sem spurt væri um fleiri kyn og skoðuð mismunandi viðhorf og reynsla þeirra.

Tilvísanir:

1. ^ Fyrir Terry Gunnell, núna prófessor emeritus í þjóðfræði og Erlend Haraldsson, sjá Erlendur Haraldsson 1978.
2. ^ Sjá Ásdís Aðalbjörg Arnalds, Ragna Benedikta Garðarsdóttir og Unnur Diljá Teitsdóttir 2008.
3. ^ Fyrir Terry Gunnell.
4. ^ Nánari útskýringu á netpanel Félagsvísindastofnunar er að finna hér: Netpanell.
5. ^ Vigt er gildi sem hver þátttakandi fær. Gildið breytir því hversu mikil áhrif svör þátttakandans hafa í heildarsvarendahópnum. Þetta er gert til að svarendahópurinn endurspegli sem best þýðið.

Heimildir:

• Ásdís Aðalbjörg Arnalds, Ragna Benedikta Garðarsdóttir og Unnur Diljá Teitsdóttir. 2008. Könnun á íslenskri þjóðtrú og trúarviðhorfum (Reykjavík: Félagsvísindastofnun Háskóla Íslands).
• Erlendur Haraldsson. 1978. Þessa heims og annars: Könnun á dulrænni reynslu Íslendinga, trúarviðhorfum og þjóðtrú (Reykjavík: Bókaforlagið Saga).
• GAGNÍS.
• Könnun á íslenskri þjóðtrú og trúarviðhorfum. (Sótt 8.02.2024).
• Survey of Icelandic Folk Belief and Belief Attitudes. (Sótt 8.02.2024).
• Collaboration with academic staff at the University of Iceland - Social Science Research Institute. (Sótt 8.02.2024).
• Samstarf við akademískt starfsfólk HÍ - Félagsvísindastofnun Háskóla Íslands. (Sótt 8.02.2024).

...