Gæti enska nafnið Randall verið skylt íslenska nafninu Randalín?

Nafn þitt

Netfang þitt

Netfang móttakanda

Ruslpóstvörn =

Svar

Gæti enska nafnið Randall verið skylt íslenska nafninu Randalín?
Enska nafnið Randall er miðaldamynd nafnsins Randolf sem er sett saman af orðunum rand ‘brún á skildi, skjaldarrönd’ og wulf ‘úlfur’. Það missti snemma vinsældir sem eiginnafn en var tekið upp sem ættarnafn. Nú er það jafnt notað sem eigin- og ættarnafn.

Nafnið Randalín var upphaflega dulnefni Áslaugar, dóttur Sigurðar Fáfnisbana, samkvæmt Ragnars sögu loðbrókar en hún fór fyrir liði til að hefna stjúpsona sinna. Það var síðan tekið upp af Oddaverjum en kona Odds Þórarinssonar hét Randalín Filippusdóttir samkvæmt Sturlungu. Nafnið er því gamalt í íslensku þótt það sé lítið notað núna. Það er samsett af rönd ‘brún á skildi, skjaldarrönd’ eins og í Randall. Uppruni viðliðarins getur verið sama orð og lín ‘léreft, léreftsdúkur, blæja’ en einnig er hugsanlegt að um sé að ræða hliðarmynd við Hlín ‘sú sem er höll að einhverjum, verndardís’.

Af framansögðu er ljóst að nöfnin Randall og Randalín eru merkingarlega skyld en meira er það sennilega ekki. Rand- er notað í fleiri nöfnum hérlendis, til dæmis Randíður og Randver.

Heimild:

• Guðrún Kvaran. 2011. Nöfn Íslendinga. Önnur útgáfa. Bls. 481–483; 302.

Mynd:

• File:A creature with two heads, one of a wolf, the other human. W Wellcome V0007386ER.jpg - Wikimedia Commons. (Sótt 16.05.2022).

...