Er fálkastofn á Íslandi og hversu stór er hann?

Nafn þitt

Netfang þitt

Netfang móttakanda

Ruslpóstvörn =

Svar

Er fálkastofn á Íslandi og hversu stór er hann?
Fálkinn (Falco rusticolus) er staðfugl á Íslandi og ein þriggja tegunda þekktra ránfugla sem verpa hér á landi, hinar eru haförn (Haliaeetus albicilla) og smyrill (Falco columbarius).^[1] Heimkynni fálkans er allt í kringum norðurheimskautið. Tegundin skiptist í nokkrar deilitegundir og kallast sú sem verpir hér á landi Falco rusticolus islandicus. Íslenski fálkastofninn er ekki alveg einangraður þar sem fálkar frá Grænlandi (Falco rusticolus candicans - hvítfálkar) heimsækja landið á hverju ári.

Fjöldi fálka hér á landi er ekki mikill. Talið er að varpstofninn sé 300-400 pör og á veturna geti fjöldinn verið allt að 2.000 fuglar. Rjúpan er helsta fæða fálkans og virðist varpárangur og afkoma unga ráðast að miklu leyti af stofnstærð rjúpunnar, þegar rjúpnastofninum hnignar gerist það sama hjá fálkanum.

Fálkinn er alfriðaður á Íslandi og nýtur jafnframt aukinnar verndar þar sem bannað er að raska ró fálka við hreiður, svo sem til ljósmyndunar, nema með leyfi Umhverfisstofnunar. Samkvæmt flokkun Alþjóðanáttúruverndarsambandsins (IUCN) telst stofninn vera í nokkurri hættu.

Tilvísun:

1. ^ Tegundirnar fálki og smyrill tilheyra ættbálki fálka (Falconiformes) en haförn tilheyrir ættbálki ránfugla (Accipitriformes). Þrjár uglutegundir lifa hér einnig. Þær eru ránfuglar en tilheyra ættbálki sem kallast Strigiformes á fræðimáli. Sjá nánar um þetta í svari við spurningunni Eru uglur ránfuglar?

Heimildir og mynd:

• Náttúrufræðistofnun Íslands: Fálki (Falco rusticolus). (Sótt 1.3.2022).
• Náttúrfræðistofa Kópavogs: Ránfuglar. (Sótt 1.3.2022).
• Fuglavefurinn: Fálki. (Sótt 1.3.2022).
• Gyr falcon - Falco rusticolus - Fálki.jpg - Wikimedia Commons. Höfundur myndar: Ómar Runólfsson. Birt undir Creative Commons Attribution 2.0 Generic leyfi. (Sótt 1.3.2022).

...