Fyrir hvað stendur G-ið í G-mjólk?

Nafn þitt

Netfang þitt

Netfang móttakanda

Ruslpóstvörn =

Svar

Fyrir hvað stendur G-ið í G-mjólk?
Öll spurningin hljóðaði svona:

Hæ hæ, hver er uppruni G-mjólkur, af hverju heitir hún G-mjólk og hvað gæti hún mögulega enst lengi?

G-ið í heiti G-mjólkur stendur fyrir geymsluþol. Mjólk sem seld er í verslunum er gerilsneydd með hitameðhöndlun til að drepa örverur sem gætu valdið sýkingum í þeim er neyta hennar. G-mjólkin er eins og önnur mjólk að öðru leyti en því að kröftugri hitameðferð er beitt til að auka geymsluþolið enn frekar.

G-mjólk, kaffirjómi og kókómjólk eru allt dæmi um vörur sem eru leifturhitaðar (e. UHT, ultra-high temperature treated) með mjög háum hita í skamma stund. Algengt er að mjólkurvörur séu þannig hitaðar við 135-150°C í 2-6 sekúndur. Slíkar vörur eiga ekki að skemmast af völdum örvera og því þarf ekki að varðveita þær í kæli til að hægja á örveruvexti fyrr en umbúðir hafa verið opnaðar. Geymsluþol þessara vara er margir mánuðir. Mjólkursamsalan, MS, gefur til dæmis upp 6 mánaða geymsluþol fyrir G-vörur.

Við langa geymslu geta orðið efnabreytingar í mjólkurvörum sem hafa áhrif á eiginleika þeirra eins og bragðgæði og áferð. G-vörur geta því orðið óhæfar til neyslu eftir mjög langa geymslu vegna skemmda sem eru af öðrum orsökum en vexti örvera.

Heimildir:

• G-vörur - Ms.is. (Sótt 12.10.2021).
• Eftir ráðuneytum | Reglugerðasafn. (Sótt 12.10.2021).

Mynd:

• MS g-mjólk 250ml - Vefverslun - Hagkaup. (Sótt 12.10.2021).

...