Hvað lifir hagamús lengi?

Nafn þitt

Netfang þitt

Netfang móttakanda

Ruslpóstvörn =

Svar

Hvað lifir hagamús lengi?
Upprunalega spurningin var:

Hver er meðalævilengd hagamúsar? Hvað lifir húsamús lengi?

Hagamýs (Apodemus sylvaticus) lifa yfirleitt ekki lengur en eitt ár og margar lifa styttra.

Hagamýs tímgast bara yfir hlýjustu mánuði ársins. Meðgöngutíminn er breytilegur eftir aðstæðum en er oft um þrjár vikur. Ungarnir hætta á spena 18-22 daga gamlir og getur ný meðganga hafist á meðan kvendýrið er enn með unga á spena. Það geta því verið fleiri en eitt got yfir sumarið. Fyrstu músaungar fara að sjást í maí á svæðum þar sem veður er mildara en annars í júní. Ungar sem fæðast að vori geta orðið kynþroska síðla sumars og þá tekið þátt í að viðhalda stofninum.

Veturinn reynist mörgum hagamúsum erfiður og eru lífslíkur þeirra lágar. Þær mýs sem komast af taka til við að fjölga sér þegar vorar á ný en ekki þarf að gera ráð fyrir að þær lifi af annan vetur.

Hvað húsamýs (Mus musculus) varðar þá glíma þær ekki við sama harða vetrarumhverfið og hagamýs. Ýmislegt annað hefur þó áhrif á lífslíkur þeirra svo sem fæðuframboð, nærvera katta, aðgerðir meindýraeyða og svo framvegis. Ef húsamús hefur aðgengi að góðu skjóli og er laus sjúkdóma og tilraunir manna og dýra til að veiða hana getur hún náð allt að tveggja ára aldri, þótt 12-18 mánuðir séu líklegri aldur.

Heimildir og mynd:

• Hagamús. Náttúrufræðistofnun Íslands.
• Wood mouse (field mouse). Woodland Trust.
• iNaturalist © suffolk_jim. Birt undir CC BY-NC 4.0 DEED leyfi. (Sótt 14.5.2024).

...