Hvað nákvæmlega er hrossaþari og hvar vex hann?

Nafn þitt

Netfang þitt

Netfang móttakanda

Ruslpóstvörn =

Svar

Hvað nákvæmlega er hrossaþari og hvar vex hann?
Hrossaþari (Laminaria digitata) er brúnþörungur af ættinni Laminariaceae en brúnþörungar eru stærstir og mest áberandi af öllum botnþörungum. Hrossaþari vex neðst í fjöru og út í sjó, allt niður á 20 metra dýpi. Hann getur myndað þaraskóg neðansjávar þar sem ýmsar smærri þörungategundir og fjölbreytt dýralíf fær þrifist.

Hrossaþari finnst í Norður-Atlantshafi, frá Cape Cod í Massachusetts í Bandaríkjunum og norður eftir ströndinni, allt í kringum Nýfundnaland, við sunnanvert Grænland og frá ströndum Norður-Rússlands suður til Frakklands. Hann er algengur við strendur Færeyja og Írlands og einnig Stóra-Bretlands, að austurhlutanum undanskildum. Á Íslandi finnst hrossaþarinn allt í kringum landið og er ríkjandi tegund á grjót- og klapparbotni þar sem skjólsælt er, enda getur hann verið viðkvæmur fyrir brimi.

Hrossaþari er lýst á eftirfarandi hátt í bókinni Sjávarnytjar við Ísland:

Hrossaþari er stórvaxin planta sem hefur greinótta festusprota sem festa þarann við botninn. Upp af festusprotunum gengur stilkur sem er lítið eitt hliðflatur og sveigjanlegur. Á stilknum situr þykkt leðurkennt blað sem oftast er klofið upp í margar misbreiðar ræmur. (Bls. 83).

Stilkur hrossþarans, sem oft er einnig nefndur þöngull, er 1,5-2 metrar á lengd þegar þarinn er fullvaxinn en blaðið verður allt að 1,5 m. Þarinn vex fremur hægt fyrstu tvö árin en þá tekur hann kipp og hefur stilkurinn náð fullri lengd 6-7 ára.

Hrossaþari er mikilvæg fæða fyrir ýmis botndýr. Ígulker og sniglar éta þarann beint en tegundir sem sía fæðu úr sjó, til dæmis kræklingur, taka til sín litlar agnir af þaranum sem sífellt brotna af endum blaðanna í öldurótinu.

Hrossaþarinn er nýttur í ýmsar vörur, til dæmis í matvæli og í lyfja- og snyrtivöruiðnaði. Á Reykhólum hefur um áratugaskeið verið þörungaverksmiðja sem vinnur þörungamjöl úr hrossaþara úr Breiðafirði.

Heimildir og myndir:

• Karl Gunnarsson, Gunnar Jónsson og Ólafur Karvel Pálsson. 1998. Sjávarnytjar við Ísland. Reykjavík, Mál og menning.
• Brúnþörungar - Vistey.is. (Sótt 9.12.2020).
• The Seaweed Site: information on marine algae. (Sótt 9.12.2020).
• Kelp forest, Ardtoe © David Baird : Geograph Britain and Ireland. Birt undir Creative Commons Attribution-ShareAlike 2.0 Generic leyfi. (Sótt 9.12.2020).
• Laminaria.jpg - Wikimedia Commons. Höfundur myndar: Stemonitis. Birt undir Creative Commons Attribution 2.5 Generic leyfi. (Sótt 9.12.2020).

...