Af hverju eru kengúrur í útrýmingarhættu?

Nafn þitt

Netfang þitt

Netfang móttakanda

Ruslpóstvörn =

Svar

Af hverju eru kengúrur í útrýmingarhættu?
Kengúrur eru pokadýr af ættinni Macropodidae. Stundum er hugtakið notað í víðri merkingu og nær þá yfir kengúrur af öllum stærðum, en oft er það aðeins notað um stærstu tegundir ættarinnar. Minni kengúrur eru þá kallaðar vallabíur (e. wallaby). Stundum er einnig talað um wallaroo, en höfundur þessa svars veit ekki til þess að það hugtak hafi verið íslenskað. Wallaroo eru þá tegundir sem eru á milli kengúra og vallabía að stærð. Í þessu svari er miðað við þrengri skilning hugtaksins og svarið tekur því aðeins til stærstu tegundanna.

Fjórar tegundir eru til af eiginlegum kengúrum. Tvær þeirra eru grákengúrur, annars vegar Macropus fuliginosus sem á ensku er kennd við vesturhluta landsins (e. western grey kangaroo) og finnst í sunnan- og vestanverðri Ástralíu og hins vegar Macropus giganteus (e. eastern grey kangaroo) sem á heimkynni sín í austurhluta landsins og á Tasmaníu. Þá er það rauðkengúran (Osphranter rufus eða Macropus rufus), sem hefur mesta útbreiðslu allra kengúra og finnst mjög víða í Ástralíu og að lokum antilópukengúran (Osphranter antilopinus eða Macropus antilopinus) sem finnst aðeins nyrst í landinu.

Engin þessara tegunda telst í útrýmingarhættu og hafa yfirvöld í mörgum fylkjum gefið út veiðikvóta til þess að halda stofnunum í skefjum. Þá eru einnig nokkur fylki sem leyfa kengúruveiði í atvinnuskyni og hafa leyfi til útflutnings á afurðum, kjöti og skinnum. Þau fjögur fylki þar sem mest er veitt af kengúrum eru Nýja Suður-Wales, Queensland, Suður-Ástralía og Vestur-Ástralía. Í stofnstærðarmati frá 2018 í þessum fjórum fylkjum var stofn rauðkengúrunnar talinn vera rúmir 12 milljón einstaklinga, vestur-grákengúrunnar um 4,5 milljónir og stofn austur-grákengúrunnar var metinn rúm 21 milljón einstaklingar. Ekki eru tölur um stofnstærð antílópukengúrunnar enda er það ekki ein þeirra tegunda sem má veiða í hagnaðarskyni og flytja út afurðirnar.

Af þessu má ráða að stofnar eiginlegra kengúra í Ástralíu séu í góðu ásigkomulagi og hverfandi hætta á því að þessar tegundir verði aldauða á komandi áratugum nema ófyrirsjáanlegar og veigamiklar breytingar verði á búsvæðum þeirra.

Heimildir og mynd:

• Ellis, M. o.fl. 2016. Macropus rufus. The IUCN Red List of Threatened Species 2016: e.T40567A21953534. (Sótt 15.7.2020).
• Munny, P. o.fl. 2016. Macropus giganteus. The IUCN Red List of Threatened Species 2016: e.T41513A21952954.(Sótt 15.7.2020).
• Burbidge, A. o.fl. 2016. Macropus fuliginosus. The IUCN Red List of Threatened Species 2016: e.T40563A21953972. (Sótt 15.7.2020).
• Woinarski, o.fl. 2016. Macropus antilopinus. The IUCN Red List of Threatened Species 2016: e.T40561A21953729. (Sótt 15.7.2020).
• Department of Agriculture, Water and the Environment. Australian native plants and animals. (Sótt 15.7.2020).
• Department of Agriculture, Water and the Environment. Macropod quotas and harvest for commercial harvest areas in NSW, QLD, SA and WA. (Sótt 15.7.2020).
• Mynd: Red Kangaroo 2 | Flickr. Höfundur myndar: Dan Armbrust. Birt undir CC BY 2.0 leyfi. (Sótt 15.7.2020).

...