Hvað hefur vísindamaðurinn Jón Hallsteinn Hallsson rannsakað?

Nafn þitt

Netfang þitt

Netfang móttakanda

Ruslpóstvörn =

Svar

Hvað hefur vísindamaðurinn Jón Hallsteinn Hallsson rannsakað?
Jón Hallsteinn Hallsson er dósent í erfðafræði við Landbúnaðarháskóla Íslands og aðjúnkt við Læknadeild Háskóla Íslands. Rannsóknir Jóns snúa að því að auka skilning okkar á aðlögun landbúnaðar að norðurslóðum með rannsóknum á bæði nytjaplöntum og -dýrum auk sjúkdómsvalda sem kunna að hafa áhrif í landbúnaði. Hefðbundnum aðferðum sameindaerfðfræði er beitt ásamt rannsóknum á svipgerðum plantna og dýra. DNA úr núlifandi einstaklingum er greint og einnig svonefnt fornDNA. Með greiningum á fornDNA er markmiðið að öðlast innsýn inn í upphaf landbúnaðar á eyjunum í Norður-Atlantshafinu.

Jón er virkur í alþjóðlegu samstarfi og tekur þátt í fjölbreytilegum rannsóknarverkefnum, allt frá rannsóknum á plöntusjúkdómum yfir í hross og sauðfé. Hægt er að lesa meira um rannsóknir Jóns og félaga á heimasíðu rannsóknarhópsins ACANA.

Jón lauk B.Sc.-prófi í sameindalíffræði frá Háskóla Íslands vorið 1999 og doktorsprófi frá Læknadeild árið 2006. Leiðbeinendur Jóns í doktorsverkefninu voru þeir Eriríkur Steingrímsson, prófessor við Læknadeild Háskóla Íslands, og Heinz Arnheiter, vísindamaður við National Institute of Neurological Disorders and Stroke, National Institutes of Health.

Doktorsverkefni Jóns fjallaði um stjórn á umritunarþáttum með eftirbreytni, þar sem tilraunlífverum og erfðabreytingum var beitt til að skilja betur þróun umræddra gena og stjórn þeirra í þroska lífvera. Að loknu doktorsnámi hóf Jón störf við þá nýstofnaðan Landbúnaðarháskóla Íslands og hefur starfað þar síðan. Samhliða störfum sínum við Landbúnaðarháskóla Íslands hefur Jón kennt allnokkuð, meðal annars við Háskóla Íslands og Listaháskóla Íslands, ásamt því að halda einstaka fyrirlestra hér og þar.

Mynd:

• Úr safni JHH.

...