Hvað hefur vísindamaðurinn Freyja Birgisdóttir rannsakað?

Nafn þitt

Netfang þitt

Netfang móttakanda

Ruslpóstvörn =

Svar

Hvað hefur vísindamaðurinn Freyja Birgisdóttir rannsakað?
Freyja Birgidóttir er dósent í þroskasálfræði við Sálfræðideild Háskóla Íslands. Hennar meginrannsóknarefni fjallar um þróun málþroska og læsis frá leikskólaaldri til unglingsára og hvernig sú þróun tengist öðrum sviðum þroska, eins og til dæmis námsáhugahvöt og getu barna til þess að stýra hugsun sinni og hegðun. Yfirstandandi rannsóknarverkefni eru meðal annars langtímarannsókn á þróun læsis og sjálfstjórnar á aldrinum 4 til 10 ára og langtímarannsókn á samspili lesskilnings, ritunar og sjálfstjórnar á aldrinum 10 til 12 ára. Freyja hefur einnig kannað mögulegar orsakir á slöku gengi nemenda á PISA-prófunum og kynjamun á gengi í lestri.

Freyja hefur sinnt ýmiskonar ráðgjöf á sviði málþroska og læsis undanfarin ár. Hún stýrði fagráði um eflingu lestrarfærni og lesskilnings að beiðni Skóla- og frístundaráðs Reykjavíkur og var í verkefnahóp um Hvítbók/læsi á vegum Menntamálaráðuneytisins sem skipað var af menntamálaráðherra. Hún var einnig formaður ritnefndar Lesvefsins sem rekin er í samvinnu við Menntavísindasvið Háskóla Íslands og Menntamálaráðuneytið. Freyja hefur hlotið styrki úr Rannsóknarsjóði Íslands (RANNÍS) og situr í framkvæmdastjórn evrópsks samstarfsverkefnis um lestur og lestrarörðugleika (COST Action: IS1401, Strengthening Europeans' capabilities by establishing the European literacy network).

Freyja lauk BA-prófi í sálfræði við Háskóla Íslands árið 1998. Hún útskrifaðist úr doktorsnámi við Oxford-háskóla í Englandi árið 2003, og var lektor við Oxford Brookes-háskóla í tvö ár. Árið 2006 hóf Freyja störf við Menntavísindasvið Háskóla Íslands og kenndi þar bæði þroskasálfræði og lestrarfræði í 10 ár. Árið 2017 hóf Freyja svo störf við sálfræðideild Háskóla Íslands þar sem hún kennir þroskasálfræði og námskeið um mál- og lestrarþróun.

Mynd:

• © Kristinn Ingvarsson.

...