Af hverju eru gæsir merktar?

Nafn þitt

Netfang þitt

Netfang móttakanda

Ruslpóstvörn =

Svar

Af hverju eru gæsir merktar?
Upprunalega hljóðaði spurningin svona:

Af hverju eru gæsir merktar? Af hverju er fólk að fylgjast með hvert gæsirnar fljúga, hvert þær fara og hvað langt? Og hvað er svo gert við upplýsingarnar þegar búið að skoða þær?

Merkingar á fuglum eru ætíð tengdar rannsóknum. Hver einstaklingur fær kennitölu á málmmerki sem sett er á fót fuglsins. Kennitalan aðgreinir fuglinn frá öðrum fuglum. Reiknað er með að rannsóknir veiti svör við spurningum. Þetta á líka við um gæsir. Til að fá ítarlegar upplýsingar um einstaklinginn er stundum sett litplastmerki ýmist á hinn fótinn eða um háls fuglsins með áberandi kóda sem hægt er að lesa á úr fjarlægð. Rafræn merki eru í sérstökum tilvikum sett á fugla til að fá enn meiri upplýsingar um einstaklinginn.

Gæsategundir hegða sér mismunandi og merkingar hafa aukið þekkingu okkar á þeim. Merkingar sýna hvað gæsir geta orðið gamlar og oft og tíðum hvað veldur þeim dauða. Ferðalög gæsanna hafa verið mönnum hulin ráðgáta og því gefa rafræn merki nákvæmar upplýsingar hvert þær ferðast og hvernig, í hvað mikilli hæð þær fljúga, hvað ferðalagið tekur langan tíma og hversu langt þær fara. Hvernig eyða þær sólarhringnum og hvar halda fuglarnir sig meðan þeir eru ófleygir eru dæmi um spurningar sem rafræn merki hafa svarað. Einnig hvernig þær nýta landið allt árið um kring. Allt er þetta liður í að auka þekkingu okkar á gæsum.

Allar upplýsingar sem safnað er með merkingum eru geymdar í höfuðstöðvum fuglamerkinga viðkomandi lands og er miðlað milli landa eftir þörfum sem nýtist til ýmissa seinni tíma rannsókna. Unnið er úr verkefnatengdum merkingarannsóknum jafn óðum og gögn berast. Má þar nefna verkefni sem á að meta mögulega hagsmunaárekstra gæsa við nýtingu mannsins á landi og hvort gæsir valdi álagi þar sem þær eru. Upplýsingum um niðurstöður merkinga er svo miðlað á veraldarvefinn, með kynningum og í skýrslum. Fræðsla um merkingar hefur aukið áhuga fólks á fuglum.

Myndir:

• Halldór Walter Stefánsson

...