Eru sýklar í rigningu?

Nafn þitt

Netfang þitt

Netfang móttakanda

Ruslpóstvörn =

Svar

Eru sýklar í rigningu?
Örverur er notað sem safnheiti yfir smásæjar lífverur sem ekki er hægt að greina með berum augum, meðal annars bakteríur. Sýkill er örvera sem veldur sjúkdómi en aðeins örlítið brot allra baktería eru sýklar.

Bakteríur finnast alls staðar á jörðinni, þar með talið á jöklum og í funheitum hverum. Þær finnast einnig í andrúmsloftinu og í regnvatni.

Seint á 8. áratug síðustu aldar komu fram hugmyndir um að bakteríur væri að finna í úrkomu. Á undanförnum áratugum hafa vísindamenn rannsakað þetta nánar og nú er ljóst að í skýjum er ofgnótt af örlitlum bakteríum. Þessar bakteríur geta virkað sem kjarnar sem skýjadropar þéttast á og stækka þar til þeir falla til jarðar sem úrkoma, ýmist rigning eða snjór. Ýmiskonar aðrar agnir í andrúmslofti hafa samskonar verkun en það sem virðist ólíkt þegar bakteríur eiga í hlut er að vatnsdropar og ískristallar geta myndast við hærra hitastig en annars.

Meðal þeirra baktería sem finnast í úrkomu eru tegundir af ættkvísl sem kallast Pseudomonas. Þessar bakteríur, aðallega tegund sem nefnist Pseudomonas syringae, geta valdið frostskemmdum á yfirborði plantna. Þær, eins og aðrar bakteríur sem kunna að finnast í úrkomu, eru þó algjörlega skaðlausar mönnum. Það eru því ekki sýklar í rigningunni þótt þar kunni að finnast bakteríur.

Vísindamenn eiga eftir að rannsaka margt sem tengist bakteríum, úrkomu og sampilinu þarna á milli. Til dæmis er ekki ljóst hversu mikinn þátt bakteríur eiga í þeirri úrkomu sem fellur til jarðar um heim allan.

Þeim sem hafa áhuga á að fræðast meira um þetta efni er bent á vísindafréttirnar í heimildalistanum hér fyrir neðan.

Heimildir og mynd:

• 'Rain-making' bacteria found around the world : Nature News. (Skoðað 21. 9. 2017).
• Bacteria in the atmosphere cause rain | ScienceNordic. (Skoðað 21. 9. 2017).
• Bacteria in the sky may help to make it rain | Popular Science. (Skoðað 21. 9. 2017).
• Rain makers: How high-flying bacteria could control the clouds | New Scientist. (Skoðað 21. 9. 2017).
• Mynd: Rain-drops.jpg - Wikimedia Commons. (Sótt 22. 9. 2017).

...