Getur maður fengið HIV-veiruna við sjálfsfróun?

Nafn þitt

Netfang þitt

Netfang móttakanda

Ruslpóstvörn =

Svar

Getur maður fengið HIV-veiruna við sjálfsfróun?
HIV-veiran berst á milli einstaklinga með sæði, leggangaslími og blóði. Smit getur átt sér stað við óvarðar samfarir konu og karls eða tveggja karla ef annar aðilinn er með veiruna. Einnig berst smit með sprautum eða sprautunálum sem mengaðar eru af HIV og við blóðgjöf ef blóðið er sýkt af veirunni. Smit getur líka borist frá móður til barns á meðgöngu, við fæðingu eða brjóstagjöf.

Ef aðeins einn aðili kemur við sögu við sjálfsfróun eru engar líkur á að viðkomandi smitist af HIV því það er enginn til þess að smita hann. Fólk smitast ekki af kynsjúkdómum ef það stundar kynlíf eitt.

Þekktar smitleiðir fyrir alnæmi eru óvarin kynmök, meðganga, fæðing og brjóstagjöf, og samnýting sprautunála eða blóðgjafir. Aðrar smitleiðir eru ekki kunnar.

Sjálfsfróun getur hins vegar verið hluti af kynferðislegum athöfnum í samböndum fólks hvort sem um gagn-, sam- eða tvíkynhneigt par er að ræða eins og fram kemur í svari Sóleyjar Bender við spurningunni Er sjálfsfróun hættuleg? Ef um slíkt er að ræða og sæði, leggangaslím eða blóð sýkts einstaklings berst á einhvern hátt í líkama annars aðila við þessa athöfn þá er vissulega hætta á smiti.

Á vef Landlæknisembættisins er umfjöllun um HIV sem ágætt er að kynna sér. Þar er meðal annars að finna eftirfarandi dæmi um það hvernig HIV smitast ekki:

• Við venjulega umgengni.
• Í gegnum heilbrigða húð.
• Með lofti og vatni.
• Með flugnabiti.
• Með mat og drykk.
• Með glösum, diskum og þess háttar.
• Með sængum, handklæðum og þess háttar.
• Af salernissetum eða baðkörum.
• Með kossum.
• Með hnerrum og hósta.
• Með svita.
• Með hori og tárum.
• Með handabandi.

Frekari fróðleikur á Vísindavefnum:

• Getur HIV-veiran borist með flugum?
• Er alnæmi það sama og HIV-veiran?
• Hvernig byrjaði alnæmi?
• Er hollt að stunda kynlíf?

Mynd: HIV-1 Tat vaccines. Sótt 18. 3. 2008...