Hvað geta úlfar orðið stórir?

Nafn þitt

Netfang þitt

Netfang móttakanda

Ruslpóstvörn =

Svar

Hvað geta úlfar orðið stórir?
Almennt gildir um dýrategundir sem hafa jafnheitt blóð og mikla útbreiðslu að einstaklingar sem lifa nálægt pólunum eru stærri en einstaklingar sömu tegundar sem lifa nær miðbaug. Þessi regla nefnist innan vistfræðinnnar regla Bergmanns. Skýringin á henni er sú að þeim mun stærri sem dýrin eru, þeim mun minna yfirborðsflatarmál hafa þau hlutfallslega og hitatap verður þess vegna ekki eins mikið. Þetta getur skipt miklu máli fyrir dýr sem lifa á heimskautasvæðunum. Regla Bergmanns á vel við þegar fjallað er um líkamsstærð úlfsins (Canus lupus) þar sem þessi tegund hefur sögulega afar mikla útbreiðslu.

Fullvaxnir úlfar eru gjarnan á bilinu 105–160 cm að lengd og 80–85 cm á hæð á herðakamb en það er þó breytilegt eftir heimkynnum. Úlfar sem finnast á Indlandi og Arabíuskaga eru að jafnaði rétt rúmlega 20 kg að þyngd en úlfar í Evrópu og Norður-Ameríku eru oft 35-40 kg. Úlfar sem lifa hvað lengst í norðri, á eyjum Kanada og á túndrusvæðum Alaska og Rússlands, geta hins vegar orðið um 70 kg.

Stærsti úlfur sem veiðst hefur í Norður-Ameríku var karldýr sem var fellt í Alaska árið 1939 og reyndist vera 79,3 kg. Enn stærra dýr hefur verið veitt í Evrasíu því skömmu eftir seinna stríð var felldur úlfur í Poltravskí-héraði í Úkraínu sem vó hvorki meira né minna en 86 kg. Sögusagnir eru um enn stærri úlfa sem hafa vegið allt að 100 kg en þær eru óstaðfestar.

Þegar talað er um stórvaxna úlfa þá er varla hægt að sleppa hinum útdauða ógnarúlfi (Canis dirus) sem lifði á sléttlendi Norður-Ameríku og dó sennilega út fyrir um 10 þúsund árum síðan. Þessir stórvöxnu úlfar gátu líklega vegið allt að 90 kg.

Myndir:

• Grey wolves | Flickr - Photo Sharing!. (Sótt 24. 2. 2016).
• Dire wolf - Wikipedia, the free encyclopedia. (Sótt 14.03.2016). Myndin er gerð ao Mariomassone & Momotarou2012 og er birt undir leyfinu Creative Commons Attribution-Share Alike 3.0 Unported license.

...