Sólin
Rís 10:17 • sest 16:10
Tunglið
Rís 21:40 • Sest 15:54
Flóð
Árdegis: 10:12 • Síðdegis: 22:46
Fjara
Árdegis: 03:46 • Síðdegis: 16:36
Vísindavefurinn tók þátt í Háskóladeginum og hafði aðstöðu á Háskólatorgi Háskóla Íslands. Þar gátu gestir fræðst um ýmislegt milli himins og jarðar, meðal annars skoðað veggspjöld um hvort hægt sé að gera hluti ósýnilega og brjóta glas með hljóði. Enn fremur mátti sjá veggspjöld um eldgos og hæsta fjall sólkerfisins en næsta haust kemur út spurningabók Vísindavefsins og Forlagsins um vísindi handa börnum og ber hún titilinn: Af hverju gjósa fjöll?
Gestir og gangandi fengu að spreyta sig á þrautum og gátum og fjölmargir reyndu að leysa þrautina óleysanlegu? Eins og gefur að skilja hafði enginn erindi sem erfiði en þrátt fyrir það voru margir handvissir um að þeir hefðu fundið réttu lausnina. Áhugamenn um rökfræði fengu einnig eitthvað fyrir sinn snúð þegar valið var á milli tveggja hurða; bak við aðrar var fjársjóður en bak við hina var hungrað ljón.Vísindadagatalið var á sínum stað og ritstjórnarmeðlimir brugðu á leik með áhugasömum og könnuðu hvort fólk þekkti þann vísindamann sem var á afmælisdegi viðkomandi. Fengu þátttakendur svo dagatal að launum fyrir erfiðið.
Fjölmargir tóku þátt í spurningakeppni Vísindavefsins en vinningshafinn að þessu sinni var Sigþór Bjarmi Geirsson og hlýtur hann að launum bókina Af hverju er himinninn blár? en í henni er að finna svör við 200 vinsælum spurningum af Vísindavefnum Í spurningakeppninni voru 4 spurningar með 4 valmöguleikum og svöruðu 60% þátttakenda rétt en flestir hinna voru þó einungis með 1 vitlaust svar. Á myndinni sést Sigþór Bjarmi taka við verðlaununum úr hendi Ívars Daða Þorvaldssonar, starfsmanns Vísindavefsins. Vísindavefurinn óskar Sigþóri Bjarma innilega til hamingju með verðlaunin!
