Hvort er meira af hvítháfum sunnan eða norðan við Ástralíu?

Nafn þitt

Netfang þitt

Netfang móttakanda

Ruslpóstvörn =

Svar

Hvort er meira af hvítháfum sunnan eða norðan við Ástralíu?
Hvíthákarlar (Carcharodon carcharias) eru algengari við suðurströnd Ástralíu en við norðurströndina.

Fjölmargar rannsóknir hafa farið fram á atferli og lífsháttum hvíthákarla. Meðal annars hafa sjávarlíffræðingar merkt mikinn fjölda hvíthákarla til að kanna ferðir þeirra og hafa rannsóknir sýnt að þeir flækjast mjög víða.

Hvíthákarlar finnast á grunnsævi um allan heim þar sem sjávarhitinn er á bilinu 12-30°C. Þeir er þó algengari á ákveðnum svæðum en öðrum, svo sem á grunnsævi undan ströndum suður Ástralíu, við Suður-Afríku, Kaliforníu, beggja megin við Mexíkó, í Miðjarðarhafi og í Adríahafi.

Við Ástralíu eru hvíthákarlar algengastir frá miðhluta Queenslands í austri, meðfram suðurströndinni og til norðvesturstrandar Vestur-Ástralíu. Sést hefur til þeirra á öllum strandsvæðum Ástralíu nema við Norðursvæðið (e. Northern Territory).

Ekki er ljóst af hverju hvíthákarlinn dreifist svona um strendur Ástralíu en ýmsar skýringar gætu komið til greina. Á hafsvæðinu milli Ástralíu, Indónesíu og Tímor er fjölmargar hákarlategundir og á svæðinu í kringum eyjar Indónesíu eru öflugir og skæðir ránfiskar eins og tígrishákarlinn (Galeocerdo cuvieri) og svartuggi (Carcharhinus limbatus). Út frá útbreiðslu þessara tegunda annars vegar og hvíthákarlsins hins vegar má velta fyrir sér hvort tegundirnar forðist samneyti við hvora aðra. Vel mætti hugsa sér að hvíthákarlinn hafi þróast fyrir milljónum ára frá formóður Carcharinus-tegunda á tempruðu hafsvæði og aðlagast veiðum á sjávarspendýrum eins og selum, sæljónum og því sem gefst á þessum svæðum, meðan hinar tegundirnar eru meira í fiskáti.

Þess má geta að hvíthákarlinn er einna skæðastur þegar kemur að árásum á menn þó aðrar tegundir, eins og tígrishákarlinn og svartuggi, séu líka þekktar fyrir að ráðast á menn enda eru hákarlar í eðli sínu tækifærissinnar hvað varðar fæðuval.

Heimild, mynd og kort:

• Carcharodon carcharias — Great White Shark. Australian Government — Department of the Environment.
• Mynd: Carcharodon carcharias.jpg - Wikimedia Commons. (Sótt 14. 4. 2014).
• Kort: Carcharodon carcharias - Wikimedia Commons. (Sótt 14. 4. 2014).

...