Hvers vegna er stærðfræði námsefni?

Nafn þitt

Netfang þitt

Netfang móttakanda

Ruslpóstvörn =

Svar

Hvers vegna er stærðfræði námsefni?
Snemma á miðöldum varð til námsefni sem nefndist hinar sjö frjálsu listir. Þær voru tvenns konar. Annars vegar var þrívegurinn – trivium: Mælskulist, rökfræði og málfræði. Þessar greinar lögðu undirstöðu að tjáningunni, töluðu og ritaðu máli. Hins vegar var fjórvegurinn – quadrivium: Reikningur, flatarmálsfræði, stjörnufræði og tónlist. Þær studdu skilning á hinum áþreifanlega heimi. Fræðin um tónlist var meðal annars um hlutföll í lengdum strengja í hljóðfærum.

Kerfi hinna frjálsu lista var ætlað upprennandi menntamönnum og stærðfræði hafði þar veglegan sess. Annars lærðu unglingar dagleg störf af foreldrum sínum og öðru fullorðnu fólki. Inn í störfin fléttaðist þekkingin á að fylgjast með og gæta afraksturs vinnunnar og eigna sinna. Í því fólst líka ofurlítil stærðfræði.

Fræðimenn okkar tíma hafa greint þrjár ástæður fyrir því að stærðfræði sé námsefni.

1. Þarfir samfélagsins: Samfélagið þarf á nokkrum hópi vel menntaðra einstaklinga að halda sem getur séð um verklegar framkvæmdir, til dæmis hannað byggingar, brýr og vegi. Enn er ekki liðin öld síðan Íslendingar urðu sjálfbjarga á því sviði. Stöðugt bætist við háþróuð tækni sem þarf að kunna skil á. Tæknin stuðlar að tæknilegri og efnahagslegri þróun samfélagsins.
2. Þarfir einstaklingsins: Hver manneskja þarf að geta séð um sín mál: ráðstafað eigum sínum og aflafé, og vera læs á upplýsingar í umhverfinu. Flestir þurfa einnig að búa sig undir eitthvert sérhæft starf í þróuðu samfélagi iðnaðar, hátækni og upplýsinga. Menntun í stærðfræði sér einstaklingum fyrir tækjum til að takast á við líf sitt í menntun og starfi, einkalífi, félagslífi og sem þegn í samfélaginu.
3. Menningarlegar ástæður: Upplýsingar og þekking flytjast frá einni kynslóð til annarrar með vel menntuðum þegnum. Það stuðlar að viðhaldi og þróun hugmyndafræði og menningar í samfélaginu.

Því fleiri sem kunna skil á tækjum, búnaði og geta lesið úr gögnum í flóknu samfélagi og eru heima í menningu þess, þeim mun meiri líkur eru á að gangverk samfélagsins virki farsællega.

Heimildir:

• Niss, Mogens (1996). Goals of Mathematics Teaching. Í International Handbook of Mathematics Education, I, bls. 11–47. Dordrecht: Kluwer Academic Publishers.
• Sverrir Jakobsson. „Hvernig var vísinda- og fræðaiðkun háttað í Evrópu á miðöldum?“ Vísindavefurinn, 14. febrúar 2006. (Skoðað 13.02.2017).

Mynd:

• student-411947_960_720.jpg. (Sótt 13.02.2017).

...