Má borða fræin úr vatnsmelónum?

Nafn þitt

Netfang þitt

Netfang móttakanda

Ruslpóstvörn =

Svar

Má borða fræin úr vatnsmelónum?
Vatnsmelóna er ávöxtur vatnsmelónuplöntunnar (Citrullus lanatus) en hún er af graskeraætt (Cucurbitaceae) eins og agúrkur, eggaldin og grasker. Margir eru hrifnir af vatnsmelónum enda ávöxturinn ferskur, safaríkur og svalandi. Melónan er gjarnan borðuð ein og sér en einnig er vinsælt að nota hana í salöt eða drykki.

Fræ vatnsmelónunnar, eða steinarnir, eru svört að lit og venjulega nokkur hundruð í hverri melónu. Einnig má oft finna litla hvíta steina en þeir eru ekki raunveruleg fræ heldur hylki sem ættu að umlykja fræ en eru tóm. Það eru líka til frælaus afbrigði af vatnsmelónu en í þeim er þó að finna þessi hvítu hylki.

Við lestur á erlendum vefsíðum kemur í ljós að þeirri sögu er gjarnan haldið að börnum, að minnsta kosti í Norður-Ameríku, að alls ekki megi kyngja steinum vatnsmelónunnar því þá geti melónuplanta tekið að vaxa í maganum. Þessi saga er í ætt við það sem krökkum hefur oft verið sagt í sambandi við að kyngja tyggjói en um það má lesa í svari við spurningunni Er hættulegt að kyngja tyggjói?

Hvort svona hræðslusögur eru ástæðan eða hvort fólki finnast steinarnir einfaldlega ólystugir þá er það svo að margir spýta vatnsmelónusteinunum út úr sér, skera þá í burtu eða nota fingurna eða önnur áhöld til þess að kroppa þá úr. Það er hins vegar alveg ástæðulaust, það er í góðu lagi að borða steina vatnsmelónunnar og reyndar er það gert víða í heiminum, til dæmis í Asíu, Afríku og Mið-Austurlöndum.

Steinar vatnsmelónunnar eru í raun fullir af næringarefnum. Eins og önnur fræ eru þeir orkuríkir, 100 g af þurrkuðum vatnsmelónusteinum gefa 557 hitaeiningar. Í hverjum 100 g eru 47 g fita, 15 g kolvetni og 28 g af prótíni. Auk þess innihalda þeir ýmis nauðsynleg vítamín og steinefni.

Í Asíu og Mið-Austurlöndum er vel þekkt að þurrka vatnsmelónusteina, rista þá síðan og jafnvel krydda, og borða svo eins og snakk. Það þekkist einnig að nota þá í súpur og te og vinna úr þeim olíu. Án efa eru steinar vatnsmelónunnar nýttir á fleiri máta enda alveg ástæðulaust að láta hráefni fara til spillis.

Heimildir og myndir:

• Nutritional value of watermelon seed kernels, dried. (Skoðað 5.10.2012).
• Health Benefits Of Watermelon Seeds | Health Benefits | Organic Food | Essential Oil. (Skoðað 5.10.2012).
• Ask the Experts: Is It Okay to Eat Watermelon Seeds? « What About Watermelon? (Skoðað 5.10.2012).
• What Are the Benefits of Watermelon Seeds? | eHow.com. (Skoðað 5.10.2012).
• What Are the White Seeds in a Seedless Watermelon? | eHow.com. (Skoðað 5.10.2012).
• Watermelon Seeds Effects | Garden Guides. (Skoðað 5.10.2012).
• Mynd af vatnsmelónu: The watermelon seed | Wonder and Beauty. (Sótt 5.10.2012).
• Mynd af fólki að skyrpa: It's the "What About Watermelon” Seed Spittin’ Contest! « What About Watermelon?. (Sótt 5.10.2012).
• Mynd úr verslun: Wuhan - Zhongshan St - seed shops - watermelon seeds - Wikipedia, the free encyclopedia:. (Sótt 5.10.2012).

...