Af hverju eru tennur hvítar?

Nafn þitt

Netfang þitt

Netfang móttakanda

Ruslpóstvörn =

Svar

Af hverju eru tennur hvítar?
Upprunalegi litur tannanna ræðst af þeim efnum sem þær eru gerðar úr en ýmislegt getur haft áhrif á litinn seinna.

Tennur skiptast í krónu, sem er hinn sýnilegi hluti tannarinnar og stendur upp í munnholið, og rót sem situr í kjálkabeininu. Aðalvefur tannarinnar er tannbeinið (e. dentin) en það er ljóst á litinn, beinhvítt eða gráhvítt (e. off white). Sá hluti tannbeinsins sem stendur upp í munnholið er hulið hörðu lagi sem nefnt er glerungur (e. enamel) og er hann harðasti vefur líkamans. Litur hans er allt frá ljósgulum yfir í að vera gráhvítur. Þar sem glerungurinn er hálfgegnsær ræðst litur tanna okkar ekki eingöngu af því hvernig glerungurinn er heldur líka litnum á tannbeininu undir.

Nýjar tennur eru hvítar en þær dökkna smám saman með aldrinum. Ýmislegt sem fólk borðar getur litað tennurnar. Hver kannast til dæmis ekki við fjólublátt bros sem gjarnan er fylgifiskur bláberjaáts? Vín, te, kaffi og tóbak eru líka algengar ástæður fyrir því að tennurnar litast. Til að byrja með er þessi litur fyrst og fremst á yfirborði glerungsins og hægt að fjarlægja megnið af honum með góðri og reglulegri tannburstun. Hins vegar gerist það smám saman að litarefni berast inn í glerunginn og hann dökknar. Tannbeinið sjálft dökknar einnig með tímanum og saman veldur þetta því að tennurnar verða dekkri með aldrinum.

Heimildir og mynd:

• Tooth enamel á Wikipedia - the free encyclopedia
• Teeth Whiteners. Chemical & Engineering News. 2003, 81:6.
• How Tooth Whitening Works á How stuff works
• Basic anatomy tooth.jpg - Wikimedia Commons. Birt undir CC BY-SA 3.0 leyfi. (Sótt 21.12.2021).

---

Þetta svar er í flokknum "bekkirnir spyrja" þar sem starfsfólk vefsins svarar spurningum frá grunnskólabekk í kennslustund, samkvæmt samningi. Lögð er áhersla á skjót svör, stutt og aðgengileg. Oft er byggt á öðrum svörum sem kunna að nýtast almennum lesendum betur....