Hversu stór hluti jarðar er hulinn ís?

Nafn þitt

Netfang þitt

Netfang móttakanda

Ruslpóstvörn =

Svar

Hversu stór hluti jarðar er hulinn ís?
Heimildum ber nokkuð saman um það að nú á tímum nái jöklar yfir um 15 milljónir km² af yfirborði jarðar sem er um það bil 3% af heildarflatarmáli jarðarinnar og um eða yfir 10% af flatarmáli þurrlendis jarðar.

Jökulskjöldur Suðurskautslandsins er langstærsta jökulbreiða jarðarinnar en þar á eftir kemur Grænlandsjökull. Í töflunni hér á eftir má sjá hvar jökla er helst að finna, en þarna eru ekki teknar með litlar heimskautaeyjar og önnur mjög smá jöklasvæði.

Svæði	Flatarmál (km2)
Suðurskautslandið	11.965.000
Grænland	1.784.000
Kanada	200.000
Mið-Asía	109.000
Rússland	82.000
Bandaríkin (þar með talið Alaska)	75.000
Kína og Tíbet	33.000
Suður-Ameríka	25.000
Ísland	11.260
Skandinavía	2.909
Alpafjöllin	2.900
Nýja-Sjáland	1.159
Mexíkó	11
Afríka	10
Indónesía	7,5

Glöggir lesendur hafa sjálfsagt rekið augun í að hér er hafísbreiðan á norðurheimskautinu ekki tekin með, enda er hún ekki jökull og því ekki inni í tölum um jökla. Við Suðurskautslandið er einnig mikil hafísbreiða. Þar sem hér var spurt um ís á jörðinni, en ekki bara jökla, þá má sjálfsagt færa rök fyrir því að líta til hafíssins líka. Hins vegar vandast málið þá aðeins því þar eru mjög miklar árstíðasveiflur, miklu meiri en þegar horft er til jökla. Sem dæmi þá náði hafísinn á norðurpólnum yfir um 15,24 milljón km² í mars árið 2012 en á þeim árstíma nær ísinn mestri útbreiðslu (sem er svipað flatarmál og jöklar jarðar ná yfir). Hins vegar var flatarmálið aðeins um 4,61 milljón km² í september 2011 þegar útbreiðslan var minnst það árið.

Heimildir og mynd:

• The National Snow and Ice Data Center:
  • Facts about glaciers. (Skoðað 13.7.2012).
  • Where are glaciers located. (Skoðað 13.7.2012).
  • Quick Facts on Arctic Sea Ice. (Skoðað 13.7.2012).
  • Arctic sea ice maximum marks beginning of melt season. (Skoðað 13.7.2012).

• Shrinking Glaciers: Area of Earth Covered By Ice is Decreasing | Suite101.com. (Skoðað 13.7.2012).
• Polar ice packs - Wikipedia, the free encyclopedia. (Skoðað 13.7.2012).
• Mynd: NASA/GSFC Scientific Visualization Studio. (Sótt 13.7.2012).

...