Er hægt að virkja sjávarföll í Hornafjarðarósi?

Nafn þitt

Netfang þitt

Netfang móttakanda

Ruslpóstvörn =

Svar

Er hægt að virkja sjávarföll í Hornafjarðarósi?
Mismunandi aðferðir eru notaðar við virkjun sjávarfalla. Gróflega má flokka sjávarfallavirkjanir í tvo flokka, virkjanir sem nýta fallhæð og virkjanir sem nýta straumhraða. Meira má lesa um þessar tegundir virkjana í svari sama höfundar við spurningunni Hvað getið þið sagt mér um sjávarfallavirkjanir?

Einn af útgangspunktum þegar meta á hagkvæmni sjávarfallavirkjana sem nýta fallhæð (hæðarmun á flóði og fjöru) er stærð þeirra, því stærri, þeim mun hagkvæmari. Stærð lóns og flóðahæð ráða mestu um mögulega stærð slíkra virkjana. Við suðausturströndina er flóðahæð ein sú minnsta á Íslandi og er meðalflóðahæðin rúmur einn metri. Meðalflóðahæð þarf að vera meiri en tveir metrar til að þessi flokkur virkjana komi til greina og þar með er búið að útiloka Hornafjarðarós.

Mikil þróun á sér stað í gerð straumvirkjana og stefna vísindamenn að því að ná sambærilegri arðsemi og næst með vindmyllum í dag, innan fárra ára. Flestar straumvirkjanir sem verið er að þróa í dag þurfa meira en tíu metra dýpi og ákjósanlegur straumhraði er á bilinu 2-3 m/s. Ef straumhraðinn fer mikið yfir 3 m/s er hætta á að þær geti skemmst. Þær útfærslur straumvirkjana sem lengst eru komnar í þróun eru frekar litlar eða um eitt MW að uppsettu afli.

Fræðilega er hægt að virkja Hornafjarðarós með straumvirkjun en rannsaka þarf hverja og eina staðsetningu sérstaklega með tilliti til umhverfis, kostnaðar og annarra aðstæðna. Nú er í gangi verkefni sem fjallar um mögulega nýtingu sjávarfallastrauma til raforkuframleiðslu í Hornafirði en niðurstöður úr því hafa ekki verið kynntar þegar þetta er skrifað, í febrúar 2013.

Mynd:

• Mats: Íslandsmyndasafn © Mats Wibe Lund. (Sótt 26. 2. 2013).

---

Í heild hljóðaði spurningin svona:

Er hægt að virkja sjávarföll í Hornafjarðarósi og ef svo er hvers vegna/af hverju ekki?

...