Af hverju fær maður spik af nammi og óhollum mat?

Nafn þitt

Netfang þitt

Netfang móttakanda

Ruslpóstvörn =

Svar

Af hverju fær maður spik af nammi og óhollum mat?
Eins og lesa má um í svari Magnúsar Jóhannssonar við spurningunni Hvers vegna verða sumir feitir þótt þeir borði alveg eins mat og þeir grönnu? ákvarðast holdafar af jafnvæginu milli neyslu og bruna. Við innbyrðum daglega fæðu sem inniheldur ákveðinn fjölda hitaeininga og þessi orka er notuð til að reka áfram ýmis efnaferli og til að framleiða varma.

Ef fæðan er orkuríkari en sem nemur orkunni sem við notum geymir líkaminn þessa umframorku í formi fitu, fitufrumurnar fyllast og stækka og við fitnum. Nánar má lesa um þetta í svari svari Þórarins Sveinssonar við spurningunni Af hverju breytast vöðvar í fitu eftir að þjálfun er hætt? og svari Þuríðar Þorbjarnardóttur við spurningunni Myndast nýjar fitufrumur þegar við fitnum?

Sælgæti inniheldur lítið af nauðsynlegum næringarefnum en er mjög orkuríkt og því þarf ekki að borða mikið af því til þess að orkuneyslan verði meiri en orkuþörfin. Sem dæmi má taka súkkulaði en Björn Sigurður Gunnarsson fjallar það í svari við spurningunni Hvaða áhrif hefur súkkulaði á líkamann? Þar má meðal annars lesa að í 100 grömmum af súkkulaði (sem jafngildir einni súkkulaðiplötu) eru yfir 500 hitaeiningar (kcal), sem samsvarar rúmlega 1/4 af daglegri orkuneyslu kvenna í síðustu landskönnun.

Á sama hátt er margt af því sem telst til óhollrar fæðu mjög orkuríkt þannig að ef við borðum mikið af slíkum mat náum við ekki að brenna öllum þeim hitaeiningum sem við innbyrðum.

---

Þetta svar er í flokknum "bekkirnir spyrja" þar sem starfsfólk vefsins svarar spurningum frá grunnskólabekk í kennslustund, samkvæmt samningi. Lögð er áhersla á skjót svör, stutt og aðgengileg. Oft er byggt á öðrum svörum sem kunna að nýtast almennum lesendum betur....