Hver er stærsta tegund allra fiska?

Nafn þitt

Netfang þitt

Netfang móttakanda

Ruslpóstvörn =

Svar

Hver er stærsta tegund allra fiska?
Stærsta fisktegundin er hvalháfurinn (Rhinodon typus) en hann getur orðið allt að 15 metra langur og vegið um 16 tonn.

Árið 1919 er talið að 19 metra langur hvalháfur hafi veiðst en þær mælingar voru ekki staðfestar af vísindamönnum og líklega var um ýkjur að ræða. Stærsti beinfiskurinn sem veiddur hefur verið er hins vegar svonefndur tunglfiskur (Mola mola). Einstaklingur af þeirri tegund sem veiddist við strendur Ástralíu árið 1908 mældist rúmir fjórir metrar á lengd og vó rúmlega 2,4 tonn! Lengsti beinfiskurinn er rússastyrja (Acipenser huso). Stærstu styrjurnar geta orðið 8 metra langar og um 1.000 kg. Slíkir risar eru nú vandfundnir þar sem styrjunni hefur fækkað verulega vegna ofveiði á undanförnum áratugum.

Ólíkt spendýrum geta fiskar haldið stöðugt áfram að vaxa. Stærð hvalháfsins helgast þess vegna helst af aldri og hversu gjöfulu svæði hann hefur alið aldur sinn í.

Í jarðlögum hafa fundist ógnarstórar tegundir fiska sem nú eru útdauðar. Ein þeirra er hákarlinn megalodon (Otodus megalodon) sem var uppi fyrir um um 20 milljónum ára og dó líklega út fyrir 3,6 milljónum ára eða jafnvel mun seinna. Hann var skæðasta ránskepna hafsins og meginuppistaða í fæðu hans voru aðallega hvalir (Ceatacea).

Megalodon var rúmlega 12 metra langur og vó að mati fræðimanna eflaust meira en 20 tonn. Hann var þess vegna þyngri en hvalháfurinn. Sumir fornlíffræðingar telja jafnvel að þessi hákarl hafi verið 15-30 metrar á lengd en ekki hafa fundist steingervingar sem staðfesta það. Tennur þessara ofurhákarla gátu orðið allt að 17 cm langar.

Sennilega hefur megalodon líkst hvítháfinum (Carcharodon carcharias) en verið meira en tvöfalt stærri. Steingerðar leifar hvala sem fundist hafa víða um heim sýna tannaför, aðallega á hryggjarliðum eflaust eftir þennan skæða hákarl.

Lítið er vitað um megalodon enda hafa nær eingöngu tennur hans fundist. Vangaveltur um stærð hans eru þess vegna byggðar á samanburði við hvítháfa nútímans. Óvíst er hvers vegna þessir risar hurfu úr heimshöfunum, kannski var það vegna tilkomu hæfari rándýra í sjónum eins og háhyrninga (Orchinus orcas).

Myndir:

• Similan Dive Center - great whale shark.jpg - Wikimedia Commons. Höfundur myndar Abe Khao Lak. Birt undir Creative Commons Attribution-ShareAlike 4.0 International leyfi. (Sótt 5.5.2022).
• The Golden Egg of Bali Island. (Sótt 5.5.2022).
• Megalodon scale.svg - Wikimedia Commons. Birt undir Creative Commons Attribution-ShareAlike 3.0 Unported leyfi. (Sótt 5.5.2022).

...