Hversu margir innflytjendur búa á Íslandi og hvaðan koma þeir?

Nafn þitt

Netfang þitt

Netfang móttakanda

Ruslpóstvörn =

Svar

Hversu margir innflytjendur búa á Íslandi og hvaðan koma þeir?
Um hugtakið innflytjandi er fjallað ýtarlega í svari við spurningunni Hvernig er hægt að skilgreina hugtakið innflytjendur? og bendum við lesendum á að lesa það fyrst.

Samsetning hópsins sem dvelur á Íslandi hefur breyst umtalsvert á undangengnum 20-30 árum. Hagstofan upplýsir að skipta megi mannfjöldanum sem ekki er fæddur hér á landi með eftirfarandi hætti árin 1998 og 2024. Ekki eru tölur frá því fyrir 1998 aðgengilegar á vef Hagstofunnar:

Heimshluti	1998 fjöldi	1998 %	2024 fjöldi	2024 %
Norðurlönd	4.881	39,3	8.197	10,0
Evrópa utan Norðurlanda með Rússlandi	3.974	32,0	52.112	63,7
Norður-Ameríka	1.497	11,9	3.103	3,8
Mið- og Suður Ameríka	251	2,0	3.240	4,0
Afríka	285	2,3	2.443	3,0
Asía	1.468	11,8	11.438	14,0
Eyjaálfa	90	0,7	249	0,3
Ótilgreint	0	0,0	1.013	1,2
Samtals	12.428		81.795

Innfæddir voru 16% fleiri árið 2024 en 1998 á sama tíma og þeim sem fæddir voru erlendis hafði fjölgað um 558%!

Nú telst hluti þeirra sem fæddir eru erlendis til hópsins innlendir. Það á til dæmis við um börn íslenskra námsmanna sem fædd eru erlendis. Upplýsingar um fjöldann 2024 liggja ekki fyrir og því eru tölur fyrir 2023 sýndar í meðfylgjandi töflu:

Bakgrunnur	1998 fjöldi	2023 fjöldi
Enginn erlendur bakgrunnur	253.651	281.425
Fædd/ur á Íslandi, annað foreldri erlent	5.915	15.604
Önnur kynslóð innflytjenda	387	6.830
Fædd/ur erlendis, íslenskur bakgrunnur	3.681	6.830
Fædd/ur erlendis: annað foreldri erlent	2.233	5.479
Innflytjandi	6.514	71.424
Alls	272.381	387.758

Það vekur athygli að íbúum sem fæddir eru á einhverju Norðurlandanna fjölgar að tiltölu en fækkar hlutfallslega. Á sama tíma fjölgar mjög bæði að tiltölu og hlutfallslega þeim sem fæddir eru annars staðar í Evrópu. Munar þar mest um Pólverja, en þeir voru orðnir um 27% þeirra sem hér dvöldu og fæddir voru erlendis árið 2024. Þrjú lönd Asíu skera sig einnig úr, en það eru Filippseyjar, Taíland og Víetnam.

Af þeim sem fæddir eru erlendis hafa aðeins 3% afrískan bakgrunn og 4% eru ættuð frá Mið- og Suður-Ameríku. Töflurnar tvær sýna að nú hafa tæp 80% þeirra sem fædd eru erlendis og hér búa, evrópskan eða norður-amerískan bakgrunn.

Samanburður við önnur Norðurlönd

Norræni tölfræðigagnagrunnurinn (nordicstatistics.com) birtir upplýsingar um bakgrunn mannfjöldans í fjórum norrænu landanna, það er að segja öllum fullvalda ríkjunum að Íslandi frátöldu. Með hliðsjón af upplýsingum frá Hagstofu Íslands má álykta um Ísland. Niðurstaðan er gefin í meðfylgjandi töflu (árið 2022).

Bakgrunnur	Danmörk	Finnland	Noregur	Svíþjóð	Ísland
Fæddur erlendis og báðir foreldrar sömuleiðis	10,9%	7,0%	15,1%	19,0%	16,5%
Önnur kynslóð innflytjenda	3,4%	1,5%	3,8%	6,3%	1,8%
Allir aðrir	85,7%	91,5%	81,1%	74,7%	81,7%
Heildarfjöldi	100,0%	100,0%	100,0%	100,0%	100,0%

Nýjustu upplýsingar ná til ársins 2022. Athygli vekur að fjöldi þeirra sem eru fæddir erlendis af erlendum foreldrum er næst hæstur á Íslandi af löndunum fimm. Aðeins í Svíþjóð er hlutfallið hærra. Þá vekur einnig athygli að hlutfall annarrar kynslóðar einstaklinga er næst lægst á Íslandi. Ástæða þessa skýrist að nokkru þegar aldurssamsetning innflytjenda á Íslandi og þróun hennar er skoðuð.

Myndin sýnir að innflytjendur eru hlutfallslega flestir á þeim aldri sem fólk er virkt á vinnumarkaði. Fáir eldri og fáir yngri. Fjölgunin á 10 ára tímabilinu 2013 til 2023 er öll hjá fólki á aldursbilinu 22-60 ára. Væntalega endurspeglar aldursmynstrið á myndinni að margir innflytjendur eru komnir vegna áhuga atvinnurekenda frekar en að viðkomandi séu að leita að framtíðardvalarlandi fyrir sig og fjölskyldu sína. Með hliðsjón af þessum upplýsingum um aldurssamsetningu innflytjenda á Íslandi má velta fyrir sér hvort kostnaður ríkis og sveitarfélaga á Íslandi vegna notkunar þeirra á félags- og heilbrigðiskerfum sé minni en ella.

Myndir:

• Yfirlitsmynd: Reykjavík - Downtown Reykjavík as seen from the top of the c… - Flickr. (Sótt 12.11.2024). Myndina tók Ville Miettinen og hún er birt undir leyfinu Deed - Attribution-NonCommercial 2.0 Generic - Creative Commons.
• Vísbending - 32. tölublað 2024. (Sótt 12.11.2024).

...