Hvað er jökull?

Nafn þitt

Netfang þitt

Netfang móttakanda

Ruslpóstvörn =

Svar

Hvað er jökull?
Jökull er ís sem er svo þykkur að hann skríður fram undan þunga sínum. Jöklar þekja tíunda hluta af þurrlendi jarðar og sumir þeirra eru mörg þúsund ára. Á þeim búa engir menn en jöklar hafa mikil áhrif á líf á landi, í hafinu og loftinu sem umlykur jörðina.

Í jöklum er mesti forði heims af hreinu vatni. Jöklar vaxa á veturna, þegar kalt er og snjór fellur, en minnka á sumrin, þegar heitt er og mikill ís bráðnar. Frá jöklunum rennur vatn um jökulár til sjávar. Jöklarnir hreyfast stöðugt og móta landið sem þeir hvíla á. Þeir mjakast áfram eins og risastórar jarðýtur sem skafa landið undir þeim, grafa sig niður í það og ýta upp jökulgörðum. Það fer eftir loftslagi hve stórir jöklar eru. Á kuldaskeiðum eru jöklar miklir og þau kallast því einnig jökulskeið en á hlýskeiðum hverfa jöklar.

Oft hafa jöklar jarðar verið miklu stærri en þeir eru núna og margir litlir jöklar hafa horfið á síðustu áratugum vegna hlýnandi loftslags.

---

Þetta svar er úr bókinni Af hverju eru jöklar og ís á jörðinni? Spurningar af Vísindavefnum um jökla og loftslagsmál. Það er birt með góðfúslegu leyfi höfundar og útgefanda. Myndina gerði Þórarinn Már Baldursson og hún er fengin úr sömu bók.

...