Hvers vegna er örbylgja ekki notuð til upphitunar á húsum?

Nafn þitt

Netfang þitt

Netfang móttakanda

Ruslpóstvörn =

Svar

Hvers vegna er örbylgja ekki notuð til upphitunar á húsum?
Örbylgjuofnar hita mat mun hraðar en venjulegir ofnar og þar að auki nota þeir minni orku. Því mætti halda að hagkvæmt væri að nota örbylgjur til að kynda húsin okkar. Þetta er þó alls ekki hægt og væri þar að auki beinlínis hættulegt.

Örbylgjur víxlverka við mismunandi efni á mismunandi hátt. Sum efni eru alveg glær fyrir örbylgjum, bylgjurnar fara óhindraðar gegnum þannig efni og þau hitna ekki neitt. Önnur efni, og má þar helst nefna vatn, gleypa auðveldlega í sig örbylgjur og við það hitna þau.

Eins og fram hefur komið í öðrum svörum hér á Vísindavefnum þá stafar hiti af hreyfingu sameinda, atóma og rafeinda. Því heitara sem efni er þeim mun meiri er hreyfing agnanna sem byggja upp efnið.

Örbylgjur hita mat í örbylgjuofnum með því að snúa í sífellu vatnssameindunum í matnum í mismunandi áttir og auka þannig hreyfingu þeirra. Bylgjurnar hita líka sykur og fitu en mest eru áhrifin á vatn. Hitinn dreifist svo gegnum matinn með varmaleiðingu. Örbylgjur hita ekki loftið inni í ofninum og ekki heldur ílátin undir matinn því bylgjurnar hafa lítil sem engin áhrif á þessar sameindir. Ílátin hitna aðeins vegna varmans frá matnum.

Kynding húsa miðar að því að hita loftið inni í húsinu og halda því við hitastig sem er þægilegt fyrir fólk. Nokkuð ljóst er að örbylgjur kæmu að litlu gagni við upphitun húsa þar sem þær hita ekki loft. Þess í stað mundu þær hita fólkið í húsinu því mannslíkaminn er aðallega gerður úr vatni. Þetta væri að sjálfsögðu mjög hættulegt. Við viljum ekki hita líffæri fólksins heldur viljum við að umhverfið sé við það hitastig sem leyfir eðlilega líkamsstarfsemi.

Í örbylgjuofnum er vandlega passað upp á að engin örbylgjugeislun leki út. Örbylgjur komast ekki gegnum málma og því eru veggirnir úr málmi og hurðin er þakin málmneti þannig að engin mælanleg geislun kemst útúr ofninum.

Frekara lesefni af Vísindavefnum::

• Rýrnar næringargildi fæðu í örbylgjuofnum? eftir Bryndísi Evu Birgisdóttur
• Verður hægt að finna upp tæki sem kælir jafn hratt og örbylgjuofn hitar? eftir Kristján Leósson
• Hvað verður um agnirnar frá rafskautinu í örbylgjuofninum, eftir að þær hafa náð ofsahraða og hitað upp vatnssameindirnar í fæðunni? Borðum við þær, eru þær hættulegar? eftir SIV og ÞV
• Hvers vegna má ekki setja málmhluti í örbylgjuofn? eftir Ara Ólafsson
• Af hverju springa egg þegar þau eru hituð í örbylgjuofni? eftir Ara Ólafsson og Þorstein Vilhjálmsson

...