Sólin
Rís 10:17 • sest 16:10
Tunglið
Rís 21:40 • Sest 15:54
Flóð
Árdegis: 10:12 • Síðdegis: 22:46
Fjara
Árdegis: 03:46 • Síðdegis: 16:36
Um útdauða risaeðlanna er fjallað á Vísindavefnum í svari Sigurðar Steinþórssonar við spurningunni Er vitað hvers vegna risaeðlur dóu út? Þar er sagt frá því að skriðdýr komu fram á jörðinni eftir aldauðaskeið sem varð fyrir 250 milljónum ára og þau ríktu þar til fyrir 65 milljón árum. Þá urðu miklar náttúruhamfarir, sennilega af völdum loftsteins sem rakst á jörðina eða þá vegna eldgosa, og þær eru meginorsök þess að risaeðlurnar dóu út ásamt 70 hundraðshlutum af öllum tegundum lífvera sem þá voru á jörðinni. Maðurinn kom hins vegar ekki fram í þróuninni fyrr en fyrir einni milljón ára eða svo, eftir því hvernig er reiknað. Menn hafa því aldrei verið samtíða risaeðlum hér á jörð og valdaskeið risaeðla og annarra skriðdýra er mörgum sinnum lengra en yfirráðaskeið mannanna sem tegundar. Við getum engan veginn gengið að neinu vísu um það hve lengi mannkynið muni lifa héðan í frá og ráða ríkjum á jörðinni enda getur býsna margt orðið til að raska þessum völdum okkar á óralöngum tímaskeiðum jarðsögunnar. Þess má ennfremur geta að það er afar algengt í þróun lífsins að tegundir deyi út. Talið er að útdauði risaeðlanna tengist því að þær hafi verið orðnar stórar og þungar auk þess sem þær voru með kalt blóð. Þetta hafi ásamt öðru orðið til þess að þær þoldu hamfarirnar miklu verr en til dæmis spendýrin sem voru þó smá þegar þetta gerðist og höfðu því ekki náð sér verulega á strik í þróuninni.
Mynd: National Museum of Natural History: The Dinosaur Hall
