Hver er uppruni lagsins „Skín í rauðar skotthúfur“ og hvernig hljómar textinn?

Nafn þitt

Netfang þitt

Netfang móttakanda

Ruslpóstvörn =

Svar

Hver er uppruni lagsins „Skín í rauðar skotthúfur“ og hvernig hljómar textinn?
Lagið sem flestir kannast við undir heitinu Skín í rauðar skotthúfur er franskt þjóðlag. Í Frakklandi er það þekkt undir heitinu Allons, bergers, partons tous eða Quand Dieu naquit à Noël. Íslenski textinn er eftir Friðrik Guðna Þórleifsson (1944-1992).

Lagið kom fyrst út með íslenskum texta á hljómplötu Eddukórsins, Jól yfir borg og bæ sem SG-hljómplötur gáfu út haustið 1971. Lögin á plötunni eru úr ýmsum áttum en flest þeirra eru þjóðlög við texta Friðriks Guðna. Lögin koma frá Spáni, Austurríki, Þýskalandi og Svíþjóð auk Frakklands. Platan fékk góðar viðtökur og seldist það vel að hún var endurútgefin þremur árum síðar, þá undir heitinu Bráðum koma jólin sem er reyndar heitið á ljóðinu sem venjulega er kallað Skín í rauðar skotthúfur.

Á plötunni eru fleiri lög sem margir kannast vel við, til dæmis lagið Betlehem (e. O Little Town of Bethlehem) og Á jólunum er gleði og gaman (Fum, Fum, Fum). Á hljóðsafn.is má heyra stutt brot úr öllum lögunum. Texti lagsins á íslensku er svona í heild sinni:

Skín í rauðar skotthúfur
skuggalangan daginn,
jólasveinar sœkja að,
sjást um allan bœinn.
Ljúf í geði leika sér
lítil börn í desember,
inni í friði og ró, úti í frosti og snjó,
því að brátt koma björtu jólin
bráðum koma jólin.

Uppi á lofti inni í skáp
eru jólapakkar
titra öll af tilhlökkun
tindilfættir krakkar.
Komi jólakötturinn
kemst hann ekki í bæinn inn,
inn í friði og ró, inn úr frosti og snjó,
því að brátt koma björtu jólin
bráðum koma jólin.

Stjörnur tindra stillt og rótt
stafa geislum björtum.
Norðurljósin logaskær
leika á himni svörtum.
Jólahátíð höldum vér
hýr og glöð í desember.
Þó að feyki snjó, þá í friði og ró
við höldum heilög jólin,
heilög blessuð jólin.

Heimildir og mynd:

• Helgi J. (2015, 19. janúar). Eddukórinn [1] (1970-76). Glatkistan. (Sótt 13.12.2023).
• Eddukórinn - Jól yfir borg og bæ. Wikimedia. (Sótt 13.12.2023).
• Helgi J. (2021, 10. mars). Friðrik Guðni Þórleifsson (1944-92). Glatkistan. (Sótt 13.12.2023).
• BRÁÐUM KOMA JÓLIN - Plata mánaðarins. (2016, 18. desember). Facebook. (Sótt 13.12.2023).
• Quand Dieu Naquit à Noël. Tradition in Action. (Sótt 13.12.2023).
• "Allons, bergers, partons tous (Shepherds, Let’s All Go!) - Quand Dieu naquit à Noël (A Christmas Child). Traditional music from County of Nice (France). (Sótt 13.12.2023).
• Santa Hat and Fence. Freerange. Höfundur myndar Jill Wellington. (Sótt 13.12.2023).

...