Hvað er hornskeifa?

Nafn þitt

Netfang þitt

Netfang móttakanda

Ruslpóstvörn =

Svar

Hvað er hornskeifa?
Skeifa er íbjúgt járn, sett undir hófa á hestum til að hlífa þeim. Sögnin að járna er höfð um það þegar skeifurnar eru negldar á hófana.

Hornskeifa er hins vegar gerð úr horni dýrs, til að mynda hrútshorni. Fyrr á tíð þekktist það hjá fátækum bændum, eða þegar skortur var á járni, að beygja stór hrútshorn og negla undir hófa í stað hinna hefðbundnu skeifa.

Í þjóðsagnasafni Jóns Árnasonar segir frá því að hægt hafi verið að þekkja útilegumenn sem komu í kaupstað á því að hestar þeirra hafi verið járnaðir með hornskeifum. Svona er því lýst í sögunni Þorsteinn á Pund og Gestur:

Fyrir tólf eða fjórtán árum kom maður einn í Reykjavík til kaupmanns sem nú er dáinn, og nefndi sig "Þorsteinn á Pund". Hann vildi enga aðra vöru en salt og korn og engin kaup eiga við kaupmanninn nema á náttarþeli. Þegar menn fóru að skoða hesta hans kom það upp að þeir voru járnaðir með hornskeifum. Þóttust menn þá ganga úr skugga um að þetta væri útilegumaður.

Heimildir:

• Þorsteinn á Pund og Gestur. (Sótt 10.8.2022).
• Ritmálssafn. (Sótt 10.8.2022).
• Magnús Sigurðsson, Orðfákur. Aðgengilegt á Snara.is. (Sótt 10.8.2022).

Mynd:

• Hrútur í rétt, 1910-1920 | 1910-1920, hrútur í rétt. Ljósmyn… | Flickr. (Sótt 10.8.2022).

...