Hver er lengsta á Norður-Ameríku?

Nafn þitt

Netfang þitt

Netfang móttakanda

Ruslpóstvörn =

Svar

Hver er lengsta á Norður-Ameríku?
Í heild hljóðaði spurningin svona:

Hver er lengsta á Norður Ameríku? Reyndi að gúggla þetta en fékk mjög mismunandi svör. Er eitthvert óumdeilt svar við þessari spurningu?

Ekki er eins einfalt að mæla nákvæma lengd vatnsfalla og það kann að virðast í fyrstu. Þar skiptir máli hvar upptök vatnsfallsins eru skilgreind og eins hvar það endar nákvæmlega. Einnig skiptir máli hversu nákvæm gögn eru notuð til þess að mæla fjarlægðina þar á milli. Um þetta er fjallað nánar í svari sama höfundar við spurningunni Hver eru lengstu fljót í heimi? og er ágætt að hafa það svar í huga við áframhaldandi lestur.

Það er rétt að þegar leitað er að upplýsingum á netinu um lengsta vatnsfall Norður-Ameríku þá eru niðurstöðurnar ekki allar á einn veg. Langflestar heimildir sem skoðaðar voru fyrir þetta svar segja þó að Missouri-áin sé lengst og Mississippi-fljót næst lengst, en í einhverjum tilfellum er þessu snúið við.

Missouri-áin á upptök sín í Montanafylki og er sögð vera á bilinu 3.766-4.088 km (2.340-2.540 mílur) löng, allt eftir því hvar upptökin eru skilgreind. Lægri talan miðast við Three Forks þar sem árnar Gallatin, Jefferson, og Madison koma saman í eitt vatnsfall en hærri talan miðast við upptök Jefferson-árinnar. Missouri-áin rennur um sex fylki Bandaríkjanna, Montana, Norður- og Suður-Dakota, Nebraska, Iowa, Kansas og Missouri, þar sem hún sameinast Mississippi og er því í raun þverá hennar. Vatnasvið Missouri-árinnar er meira en 1.371.000 km² og nær til tíu fylkja í Bandaríkjunum og tveggja í Kanada.

Upptök Mississippi-árinnar eru venjulega talin vera í Itasca-vatni í Minnesota. Þaðan rennur hún 3.700-3.780 km (2300-2350 mílur) leið til sjávar í Mexíkóflóa. Á leið sinni fer hún í gegnum, eða er á mörkum tíu fylkja, Minnesota, Wisconsin, Iowa, Illinois, Missouri, Kentucky, Tennessee, Arkansas, Mississippi, og Louisiana. Vatnasvið árinnar er um 3.220.000 km² og nær til 32 fylkja í Bandaríkjunum og tveggja í Kanada.

Niðurstaðan er því sú að það er ekki óumdeilanlega eitt rétt svar við spurningunnu um hvert er lengsta vatnsfall Norður-Ameríku. Algengast er þó að nefna Missouri-ána. Hins vegar er engum blöðum um það að fletta að Mississippi hefur vinninginn þegar kemur að stærð vatnasviðs og hún er einnig vatnsmesta á Norður-Ameríku.

Heimildir og mynd:

• Kammerer, J.C. 1990. Largest Rivers in the United States, US Geological Survey Fact Sheet OFR 87-242. (Sótt 23.2.2022).
• National Park Service: Mississippi River Facts. (Sótt 23.2.2022).
• GlobalGeografia.com: United States Longest Rivers. (Sótt 23.2.2022).
• American Rivers: Missouri River og Mississippi River. (Sótt 23.2.2022).
• Committee on Missouri River Ecosystem. 2002. The Missouri River Ecosystem. (Sótt 23.2.2022).
• Encyclopædia Britannica: Missouri River og Mississippi River. (Sótt 23.2.2022).
• Wikipedia: Missouri River og Mississippi River. (Sótt 23.2.2022).
• WorldAtlas: The Missouri River og The Mississippi River. (Sótt 23.2.2022).
• Legends of America: The Mighty Missouri River og The Mississippi River and Expansion of America. (Sótt 23.2.2022).
• Maps of World: What are the top 10 Longest Rivers in the US? (Sótt 23.2.2022).
• Kentucky Great River Road: The Mississippi River - Fun Facts. (Sótt 23.2.2022).
• Freeworldmaps.net. (Sótt 23.2.2022).

...