Er hægt að hafa bessadýr sem gæludýr?

Nafn þitt

Netfang þitt

Netfang móttakanda

Ruslpóstvörn =

Svar

Er hægt að hafa bessadýr sem gæludýr?
Stutta svarið við spurningunni er einfaldlega: Já, það er vel hægt, til dæmis ef bessadýrið er haft í svonefndri petrískál sem annars er yfirleitt notuð til frumuræktunar.

Bessadýr (Tardigrade) eru smávaxin dýr, um 1 mm á stærð og því vel sýnileg í víðsjá. Þau finnast ýmist í salt- eða ferskvatni en einnig í annars konar röku umhverfi, svo sem í votlendi og mosaþembu. Þau finnast nánast í öllum vistkerfum jarðar, allt frá mosaþembu regnskóganna alla leið norður í Íshaf. Fjölmargar tegundir bessadýra þurfa að takast á við miklar öfgar í hita- og rakastigi og hafa sýnt fádæma aðlögunarhæfni.

Vegna þess hversu harðgerð bessadýr eru er afar auðvelt að hafa þau sem einhvers konar gæludýr, það er að halda þau í búri, skál eða jafnvel í petrískál (e. Petri dish, þ.e. frumuræktunarskál) ef því er að skipta. Miðað við gullfiska eða önnur „flóknari“ dýr sem þurfa að lifa í röku og blautu umhverfi eru bessadýr ekki krefjandi gæludýr.

Alls hafa að minnsta kosti 20 tegundir bessadýra fundist hér á landi, einkum grunnt í jarðvegi, til dæmis í grassverði eða mosa þar sem þau festa sig oft við jurtir og sjúga safa úr þeim eða veiða smásæja þráðorma (nematoda) sem finnast í umhverfi þeirra.

Ef einhver vill ná sér í bessadýr og halda það á heimilinu er því vænlegast að nálgast grassvörð eða mosa þar sem bessadýr finnast. Þegar dýrið er fundið og komið í hús ætti að setja það í petrískál með vatni og þá er hægt að fylgjast með því í einföldustu víðsjá. Þannig má njóta þess að sjá þennan spennandi heim smávöxnustu fjölfruma dýra sem finnast í okkar nánasta umhverfi hvort sem það eru bessadýr eða þráðormar eða jafnvel frumdýr.

Mynd:

• SEM image of Milnesium tardigradum in active state - journal.pone.0045682.g001-2.png - Wikimedia Commons. Birt undir CC BY 2.5 leyfi. (Sótt 24.2.2022).

...